കഥ പറയുമ്പോൾ… (ജ്വാല ) 1272

പുള്ളെ ഇങ്കെ വാ…

ഞാൻ മടിച്ചു അങ്ങോട്ടേയ്ക്ക് നീങ്ങി നിന്നു.

നീ വന്ത് ജബ്ബാറുക്കെ പിള്ള താനേ…

ഞാൻ തല കുലുക്കി,

അയാൾ മരത്തിന്റെ പൈസ ഇടുന്ന പെട്ടിയിൽ നിന്ന് പത്ത് പൈസ കൂടി തന്നു.
ഞാനത് വാങ്ങാൻ മടിച്ചു,

എനിക്ക് വേണ്ട,

അവൻ വന്ത് അപ്പാ മാതിരി താൻ അഭിമാനി ആക്കും…

അയാൾ പറഞ്ഞത് എനിക്ക് തിരിഞ്ഞൊന്നും ഇല്ല ഞാൻ കൂട്ടുകാരുടെ അടുത്തേയ്ക്ക് ഓടി,
എല്ലാവരും പൊറോട്ട കഴിക്കാനായി ഹോട്ടലിൽ കയറി പക്ഷെ എനിക്ക് അതിൽ താല്പര്യം ഇല്ലായിരുന്നു,

ഉമ്മ അറിഞ്ഞാൽ വഴക്ക് പറയും.
ഉച്ചക്ക് കഴിച്ചില്ലെങ്കിൽ അടി കിട്ടുകയും ചെയ്യും….

അപ്പോഴാണ് നീണ്ട ഹൊറാൺ അടിച്ച് രാജേശ്വരി മോട്ടേഴ്സ് എന്റെ മുമ്പിൽ നിർത്തിയത്, ഞങ്ങളുടെ നാട്ടിലേക്ക് പോകുന്നതാണ്.
ആകാംക്ഷയുടെ പുറത്ത് ഞാനതിൽ കയറി,

ചകിരി കൊണ്ടുള്ള നല്ല സീറ്റ്, ഞാൻ സൈഡ് സീറ്റിൽ ഇരുപ്പുറപ്പിച്ചു, വണ്ടിയിൽ നിന്ന് ഉച്ചത്തിൽ സിനിമാ ഗാനം കേൾക്കുന്നുണ്ടായിരുന്നു…

വണ്ടി മുന്നോട്ട് നീങ്ങി,

ടിക്കറ്റ്, ടിക്കറ്റ് ,
കണ്ടക്ടർ അടുത്ത് വന്നപ്പോൾ ഞാൻ അൻപത് പൈസ നീട്ടി അയാൾ അത് വാങ്ങി തുകലിന്റെ സഞ്ചിയിൽ ഇട്ടിട്ട് ഒരു പത്തു പൈസ ബാക്കി തന്നു,
പച്ചക്കളറിലെ ടിക്കറ്റിൽ പെൻസിൽ കൊണ്ട് വരച്ചു എനിക്ക് തന്നു ഞാൻ അത് ശ്രദ്ദാപൂർവ്വം ഷർട്ടിന്റെ പോക്കറ്റിൽ വച്ചു.

വണ്ടി ഞങ്ങളുടെ ഗ്രാമത്തിലേക്ക് പ്രവേശിച്ചു, വീടിനു അടുത്തുള്ള സ്റ്റോപ്പിൽ ബസ് നിർത്തി, ഞാൻ മാത്രമായിരുന്നു അവിടെ ഇറങ്ങാൻ ഉള്ളത്.