കഥ പറയുമ്പോൾ… (ജ്വാല ) 1272

ഫൈസൂ ,
വെളിയിൽ നിന്ന് ഘനഗംഭീരമായ ശബ്ദം കേട്ട് നോക്കുമ്പോൾ സഖാവ്, ചോദ്യവും, പറച്ചിലും ഒന്നും ഉണ്ടായിരുന്നില്ല എന്റെ മുഖമടച്ചു കിട്ടി അടി.

എന്റെ ജീവിതത്തിൽ ആദ്യമായി കിട്ടിയ അടി. സഖാവിന്റെ മുഖം ദേഷ്യത്തിൽ വലിഞ്ഞു മുറുകി നിൽക്കുകയാണ്.

നീ ആരോട് ചോദിച്ചിട്ടാ കൂപ്പിൽ പോയത്?

അത്….

ഞാൻ ഉത്തരം കിട്ടാതെ പരുങ്ങി.

എന്റെ ജബ്ബാറിന്റെ മകന് ഈറ്റ വെട്ടി വേണ്ട ജീവിക്കാൻ, അതിന് എന്റെ മയ്യത്ത് കാണണം, ബഹളം കേട്ടിട്ട് ആകണം മൂത്തുമ്മയും അങ്ങോട്ടേയ്ക്ക് എത്തി.

നിന്റെ ബാപ്പ ഇവിടെ ഇവളെയും കൂട്ടി വരുമ്പോൾ ഞാനും, ഇവളും മാത്രമായിരുന്നു ഇവർക്ക് കൂട്ട്,

എന്റെ അനുജനായിരുന്നു അവൻ, അവൻ മരിച്ചത് എനിക്ക് വേണ്ടി ആണ്, അവസാനം അവൻ പറഞ്ഞത് എന്റെ കുടുംബത്തെ അനാഥമാക്കല്ലേ എന്നാണ്,

ഞാൻ ജീവിച്ചിരിക്കുമ്പോൾ നിങ്ങളെ കഷ്ടപ്പെടാൻ അനുവദിക്കില്ല,
സഖാവ് ദേഷ്യപ്പെട്ടു പിന്നെയും എന്തൊക്കെയോ പറഞ്ഞു ചവിട്ടി കുലുക്കി കടന്നു പോയി.
സങ്കടവും, വേദനയും കൊണ്ട് ഞാൻ തല കുനിച്ചു നിൽക്കുകയായിരുന്നു അപ്പോൾ,

ഫൈസു,… ഫൈസു…

എന്താ ,

നീ കാരണം ഇന്ന് എനിക്കും കിട്ടി വയറു നിറയെ, സഖാവിനെ ആദ്യമായാ ഇങ്ങനെ കാണുന്നത്.

ഉമ്മാ, ഇതുവരെ ആരും ഒന്നും പറഞ്ഞില്ല, ഉമ്മായും, ബാപ്പയും എവിടെ നിന്നാ വന്നത്? ഈ കഥകൾ ഒന്നും ആരും പറഞ്ഞിട്ടില്ല ഇന്ന് സഖാവ് പറഞ്ഞതിന്റെ വാസ്തവം എന്താണ്?
ഉമ്മ ഇരുന്നയിടത്ത് നിന്ന് എഴുന്നേറ്റു, എന്റെ അടുത്തു വന്നു മുഖത്ത് തഴുകി.