ഓപ്പറേഷൻ ഗ്രേറ്റ് വാൾ -മിസ്റ്റീരിയസ് ഐലൻഡ് പാർട്ട് 4 (Pravasi) 1893

Part 4
അടുത്ത നിമിഷമവൾ ഇരുകൈ കൊണ്ടും അവനെ ചുറ്റി പിടിച്ചു കൊണ്ട് വട്ടം കറങ്ങി… അപ്രതീക്ഷിതമായി ഉണ്ടായ ആ നീക്കത്തിൽ നില തെറ്റി അതുൽ അവൾക്ക് മുകളിലൂടെ മറഞ്ഞു… അതോടൊപ്പം തന്റെ പുറകിൽ അതിശക്തമായ ഒരു ചവിട്ട് കൂടി അതുലിനു കിട്ടി…

തെറിച്ചു വീണ അതുലിന്റെ വായിലേക്കും മൂക്കിലേക്കും എല്ലാം കൊഴുത്ത ചെളിയും മണ്ണും വെള്ളവും കലർന്ന മിശ്രിതം കയറാൻ തുടങ്ങിയപ്പോൾ താൻ ചതുപ്പിലാണ് വീണത് എന്ന് അയാൾക്ക് മനസിലായി…

പിടഞ്ഞു കര കയറാൻ ശ്രമിക്കും തോറും താൻ ചെളിയുടെ ആഴങ്ങളിലേക്ക് താഴ്ന്നുകൊണ്ടിരിക്കുകയാണെന്ന് അതുൽ പേടിയോടെ അറിഞ്ഞു…

ചെളിയുടെ പ്രെഷർ കൊണ്ട് അതുലിന്റെ ശക്തി മുഴുവൻ ക്ഷയിച്ചു കൊണ്ടിരുന്നു…. എങ്കിലും അതുൽ രണ്ടു മിനിറ്റുകൾ എങ്കിലും പരമാവധി ശ്രമിച്ചു അതിൽ നിന്നും ഒരു കച്ചി തുരുമ്പിലെങ്കിലും പിടിച്ചു രക്ഷപെടാൻ….

പതിയെ അതുലിന്റെ ശരീരത്തിലെ ഓക്സിജൻ ലെവൽ താഴ്ന്നു കൊണ്ടിരുന്നു… അതിനാൽ അയാളുടെ രക്ഷപെടാനും അനങ്ങാനുമുള്ള കഴിവ് കുറഞ്ഞു കുറഞ്ഞു അതുൽ ചെളിയിൽ ആഴ്ന്ന് പോയ് കൊണ്ടിരുന്നു….

പെട്ടന്ന് ഒരു കൈ അതുലിനെ ചുറ്റി പിടിച്ചു… അവസാന ശ്രമം എന്ന നിലയിൽ അതുലും ആ കയ്യുടെ ഉടമയെ പരമാവധി ശക്തി ഉപയോഗിച്ചു പിടിച്ചു രക്ഷപെടാൻ ശ്രമിച്ചു…

അതുലിന്റെ കയ്യിൽ തടഞ്ഞത് കാട്ടുവള്ളികളും ഇലകളും ചേർന്നുള്ള ആവരണത്തിൽ ആയിരുന്നു… അത് പാതി കീറി അതുലിന്റെ കയ്യിൽ പെടുമ്പോളേക്ക് ആ കൈ അതുലിനെ മുകളിലേക്ക് പൊക്കി….

മുകളിലേക്ക് ഉയരും തോറും തന്റെ ശരീരത്തിൽ ആ ചതുപ്പ് ചെലുത്തുന്ന പ്രെഷർ കുറഞ്ഞു വരുന്നത് അയാൾക്ക് അനുഭവപ്പെട്ടത്തോടെ അതുൽ അല്പം ശാന്തനായി… പതിയെ അയാളുടെ തല ചെളിയുടെ മുകളിലെത്തി…

മൂക്കിൽ ചെളി അടിഞ്ഞത് കൊണ്ട് വായ് കൊണ്ട് ശ്വാസം ഗാഢമായി ഉള്ളിലേക്ക് വലിച്ചു കുറെയേറെ ചുമച്ച ശേഷമാണ് അതുൽ കണ്ണുകൾ തുറക്കാൻ ശ്രമിക്കുന്നത്….

ആദ്യ വീഴ്ചക്ക് ഒപ്പം തന്നെ അതുൽ കണ്ണുകൾ ഇറുക്കി അടച്ചിരുന്നു…. എങ്കിലും അതിനിടെ തന്നെ അല്പം ചെളി കണ്ണുകളിൽ പോയത് കൊണ്ട് ചെറിയ നീറ്റൽ തോന്നി അതുലിനു.. പക്ഷേ അയാളിലെ പോരാളി തളരാതെ ബദ്ധപ്പെട്ട് കണ്ണുകൾ തുറന്നു…

ചുറ്റിലുമുള്ള കാഴ്ചകൾ തലച്ചോറിലേക്ക് എത്തിയപ്പോൾ അതുൽ കാണുന്നത് തന്നെ സ്വന്തം ശരീരത്തോട് ചേർത്തു പിടിച്ചിട്ടുള്ള ആ സ്ത്രീയെ തന്നെയാണ്….

അവരുടെ ഒരു കയ്യിൽ നിന്നും ചെറിയ ചരട് മുൻപ് അമ്പ് തറച്ച മരത്തിലേക്ക് ചുറ്റിയിരിക്കുന്നു… മറുകൈ കൊണ്ട് അവർ അതുലിനെ ചേർത്തു പിടിച്ചിട്ടുണ്ട്…

അപ്പോളാണ് അതുലിനു മനസിലായത് മരണ വെപ്രാളത്തിൽ തന്റെ കൈകൾ പിടിച്ചത് ആ സ്ത്രീയുടെ മാറിൽ അണിഞ്ഞ വള്ളികളും ഇലകളും കൊണ്ടുള്ള വസ്ത്രത്തിലാണ് എന്ന്…