ഒരു ബാംഗ്ലൂർ വാരാന്ത്യം 11 [Santhosh Nair] 994

” കഴിച്ചിട്ടാണോടാ അമ്പലത്തിൽ പോകുന്നത്?” കൊച്ചച്ഛന്റെയാണ് മറുചോദ്യം.

“അകത്തു കയറേണ്ട, നമുക്ക് മറ്റൊരാളെ കാണാനുണ്ടവിടെ”.

“ശരി എങ്കിൽ പോയേക്കാം” ഞങ്ങൾ ഒരുങ്ങിയിറങ്ങി. വീട്ടിൽനിന്നും അയ്യപ്പൻറെ അമ്പലം നടക്കാനുള്ള ദൂരമേയുള്ളൂ.   വീടും ഗേറ്റും പൂട്ടിയിട്ടു ഞങ്ങൾ അങ്ങോട്ട് നടന്നു പോയി.

വെളിയിൽ നിന്നും തൊഴുതിട്ടു നോക്കുമ്പോൾ അന്നു കണ്ട ചേട്ടൻ കൗണ്ടറിൽ ഉണ്ട്.  നേരെ അങ്ങോട്ട് നടന്നു. ഞങ്ങളെ എല്ലാവരെയും ഒരുമിച്ചു കണ്ടപ്പോൾ ചേട്ടന്റെ മുഖത്തൊരു പരിഭ്രമം ഉണ്ടായത് ഞാൻ ശ്രദ്ധിച്ചു.

അദ്ദേഹം കവുണ്ടറിൽ ഇരുന്ന ജോലിക്കാരനോട് എന്തോ പറഞ്ഞിട്ട് വെളിയിൽ വന്നു.  ഞങ്ങൾ അല്പം മുൻപോട്ടു നടന്നു ആ വലിയ മരത്തിനു ചുവട്ടിൽ നിന്നു.

അല്പം ഗൗരവത്തിൽ തന്നെ ഞാൻ ചോദിച്ചു “ഇതൊക്കെ ആരുടെ പ്ലാൻ ആയിരുന്നു?”

ആ ചേട്ടനും അമ്മാവനും കൊച്ചച്ഛനും ചേർന്ന് ചോദിച്ചു “എന്ത്? ഏതൊക്കെ?”

“കഴിഞ്ഞത്തിനു മുമ്പത്തെ വെള്ളിയാഴ്ച മുതൽ ഞായറാഴ്ച വരെ മൂന്ന് ദിവസങ്ങളിൽ നടന്ന സംഭവങ്ങൾ, എന്നെ പറ്റിക്കാമെന്നു കരുതേണ്ട, എന്താണെന്ന് തുറന്നു പറഞ്ഞോളുക. അല്ലെങ്കിൽ എനിക്ക് ചില തീരുമാനങ്ങൾ എടുക്കേണ്ടി വരും, പിന്നെ എന്നെ കുറ്റം പറയേണ്ട”.

എല്ലാ പ്ലാനുകളും പൊളിഞ്ഞു എന്ന് അവർക്കു മനസ്സിലായി.  കൊച്ചച്ഛൻ എന്റെ കൈ കവർന്നുകൊണ്ടു പറഞ്ഞു.  “മോനെ, എന്നോട് നീ ക്ഷമിക്കു. ഇത് ഞാനും നിന്റെ അമ്മാവനും ഇവനും നടത്തിയ പ്ലാൻ ആണ്. നിന്റെ കല്യാണം നടക്കുന്നില്ല എന്ന് പറഞ്ഞുകൊണ്ടുള്ള ഏടത്തിയുടെ കരച്ചിലും, മുറിഞ്ഞു പോയ ബന്ധങ്ങൾ കൂടിച്ചേർക്കലും എല്ലാം കൂടി കുറെ നല്ല പ്ലാനുകൾ ആണ് മനസ്സിലുണ്ടായിരുന്നത്.”

അച്ഛൻ പറഞ്ഞു “അതെ മോനെ, കണ്ണൻ എന്നോട് എല്ലാം  പറഞ്ഞിരുന്നു. അച്ചൂട്ടിയോട് നിന്റെ അമ്മക്കുള്ള പിണക്കം മാറാനും ബന്ധങ്ങൾ ഒന്നാക്കാനും ഉള്ള ഉരുപാധിയായിരുന്നു, ഇത്. നീ ക്ഷമിക്കണം. എല്ലാവര്ക്കും ഇപ്പോൾ ഉള്ള സന്തോഷത്തിനു നീ ഒരു കാരണമാണിപ്പോൾ”.

അമ്മാവൻ തുടർന്നു “സോറി ഡാ, അന്ന് നടന്നതെല്ലാം ഒരു പ്ലാൻ പ്രകാരമായിരുന്നു. ശ്രീയുടെ ബാഗ് എടുത്തു വെച്ചിട്ടു നിന്റെ അടുത്ത് ഹെല്പ്   ചോദിക്കാൻ പറഞ്ഞത് ഞങ്ങളുടെ നിർദ്ദേശപ്രകാരം ആയിരുന്നു. നിന്റെ മാനേജർ രമേശും ഞങ്ങളെ ഹെല്പ് ചെയ്തിരുന്നു. അന്ന് കാർ മനപ്പൂർവം കേടാക്കിയതും (Battery disconnect) അതിനാണ്.  രമേശ് ശ്രീയുടെ ഒരു ഡിസ്റ്റന്റ് കസിൻ ആണ്. ഇങ്ങനെയൊക്കെ അല്ലാതെ നീ വിവാഹത്തിന് സമ്മതിക്കും എന്ന് തോന്നിയില്ല. നിന്റെ മനസ്സിൽ മറ്റാരെങ്കിലും ഉണ്ടോ  വഴിയില്ലായിരുന്നു.

“നിങ്ങളൊക്കെ എന്ത് വലിയ റിസ്ക് ആണെടുത്ത്. ശ്രീ പോയത് മറ്റാരുടെ എങ്കിലും അടുത്തായിരുന്നെങ്കിലോ? മറ്റെന്തെങ്കിലും അവിടെ നടന്നിരുന്നുവെങ്കിലോ?”

അമ്മാവൻ തുടർന്നു “ഞങ്ങൾക്ക് നിന്നെ അറിയാം, നിന്നെപ്പോലെ ഒരുപയ്യനെ എന്റെ മോൾക്ക് വേറെ കിട്ടില്ല എന്നാണു നിന്റെ കൊച്ചച്ഛൻ പറയുക.  മറ്റു വീട്ടുകാരുടെ കൂടെ ബന്ധം ഇല്ലെങ്കിലും ഞാനും നിന്റെ കൊച്ചച്ഛനും ഇവനും (കൗണ്ടറിൽ ഇരുന്ന അങ്കിൾ) തമ്മിൽ നല്ല ബന്ധം പുലർത്തിയിരുന്നു.”