ഒരു ബാംഗ്ലൂർ വാരാന്ത്യം 11 [Santhosh Nair] 994

പിന്നെയുള്ള കാര്യങ്ങളും പെട്ടെന്നായിരുന്നു, മന്ത്രകോടി കൊടുത്തു.  മോതിരം മാറി, ദക്ഷിണ, അനുഗ്രഹം, സമ്മാനങ്ങൾ, അഭിനന്ദനങ്ങൾ, അങ്ങനെ ഒരേ തിരക്ക്.  അത് കഴിഞ്ഞു മന്ത്രകോടി ഉടുത്തുകൊണ്ടു ശ്രീ വന്നു.  പിന്നീട് സീറ്റു സാരി ഉടുത്തുകൊണ്ടു ചില ചടങ്ങുകൾ.  എല്ലാം കൂടി ഒരു മണിക്കൂറുകൊണ്ട് ചടങ്ങുകൾ കഴിഞ്ഞു.

പിന്നീട് ഭക്ഷണം കഴിക്കാനുള്ള തിരക്കായിരുന്നു.  ഭക്ഷണം കഴിഞ്ഞപ്പോഴേക്കും എല്ലാവരും പോകാനുള്ള തിരക്കിലായി.  ഞങ്ങൾ ആദ്യം പോകുന്നത് ശ്രീയുടെ വീട്ടിലേക്കാണ്.  നാളെയാണ് ഗുരുവായൂരിൽപ്പോയിട്ടു അതുവഴി കോട്ടയത്തിനു പോകുന്നത്.  ശാന്തി മുഹൂർത്തം നാളെയാണ് അതുകൊണ്ടുതന്നെ ഇന്നു രാത്രി ചായ്പു തന്നെ.

കോട്ടയത്ത് നിന്നു വന്നവർ എല്ലാവരും ബസിൽ പോയി.  താജ്, അഗസ്റ്റിൻ, ജോർജ്, അജി, എല്ലാവരും കുടുംബസമേതം  തിരികെപ്പോയി. അടുത്ത ദിവസം തിങ്കൾ ആയതിനാൽ എല്ലാവര്ക്കും തിരക്കുണ്ട്.

ബാംഗ്ളൂരിൽ നിന്നു വന്നവരെല്ലാം നേരെ റെയിൽവെ സ്റ്റേഷനിലേക്ക് പോയി.  സൂസനും അളിയനും അച്ഛനും അമ്മയും കുട്ടികളും ഇറങ്ങി.  ശ്രീയും പൂജയും പ്രീതിയും അവളും കെട്ടിപ്പിടിച്ചൊരു കരച്ചിലും പാസ് ആക്കി.  ഷാലട് അപ്പച്ചനെയും അമ്മച്ചിയേയും കൂട്ടി ബസിൽ തന്നെ പോയി. അവന്റെ വണ്ടി കോട്ടയത്തുണ്ട്.  ബാംഗളൂരിൽ നിന്ന് വന്നവർ രമേശ് സാറും ഭാര്യയും താത്താവോടു സംസാരിച്ചു കൂടെ നിന്നു.  അവർ തിങ്കളാഴ്ച രാത്രിയെ ബാംഗ്ളൂര്ക്കു മടങ്ങുകയുള്ളൂ.  മേനോൻ അങ്കിളും, ആന്റിയും, നാരായണൻ അങ്കിളും, ഭാര്യയും, അച്ഛനും, അമ്മയും, ചിറ്റയും, കൊച്ചച്ഛനും, താത്താവും ഞാനും ശ്രീയും പൂജയും ജാനകിചേച്ചിയും വെങ്കിയണ്ണനും പദ്മനാഭനും കാറുകളിലും വെങ്കിയണ്ണന്റെ ടെമ്പോ ട്രാവലറിലുമായി വീട്ടിലേക്കു തിരിച്ചു.  താത്താവും പാട്ടിയും രമേശ് സാറിന്റെ കാറിൽ കയറി.  ഗിഫ്റ്റുകളും മറ്റു സാധനങ്ങളും ടെമ്പോയിൽ വെച്ചു.

വീട്ടിൽ വന്നയുടനെ ഞങ്ങളെ ജാനകിച്ചേച്ചിആരതിയുഴിഞ്ഞു സ്വീകരിച്ചു.  ഗിഫ്റ്റുകൾ എല്ലാം പൂജയും പ്രീതിയും അട്ടിമറി തൊഴിലാളികളേക്കാൾ വീറോടെ ചുമന്നു ഗസ്റ് റൂമിലേക്ക് മാറ്റി.  ഇന്ന് ഞാൻ ഹാളിൽ കിടക്കണം.  ഗസ്റ്റുകൾ കൂടുതലാണ്.  അപ്പോഴേക്കും അയല്പക്കകാർ വന്നു.  (അവരൊക്കെ നേരത്തെ പോന്നിരുന്നു.  ഞങ്ങളാണ് അവസാനം ഇറങ്ങിയത് – ചെറുക്കൻ വീട്ടുകാരും പെൺ വീട്ടുകാരും ഒരേ ഫാമിലി ആവുമ്പോൾ ഇങ്ങനൊക്കെയാണ്).

എന്തായാലും രാത്രി ഭക്ഷണശേഷം പ്ലാനുകൾ കുറച്ചു മാറി.  പദ്മനാഭന്റെ ഏതോ രോഗിയുമായി സംബന്ധപ്പെട്ട വിഷയത്തിൽ നാളെ രാവിലെ തന്നെ എത്തണം എന്നു കാൾ വന്നു.  അതുകൊണ്ടു അവനു പോകണം. കൂടെ നാരായണൻ അങ്കിളും ഭാര്യയും മേനോൻ അങ്കിളും ആന്റിയും  പുറപ്പെട്ടു. എന്റെ കാരാണെടുത്തതു.  അങ്കിളിന്റെ കാർ ഞാൻ വരുമ്പോൾ കൊണ്ടുവരാൻ പറഞ്ഞു.  രമേശ് സാറും ഭാര്യയും അവരുടെ വീട്ടിലേക്കു പോയി.  (പുറപ്പെട്ട രണ്ടു കൂട്ടരുടെ കാറിലും താത്താ വെങ്കിയണ്ണനോട് പറഞ്ഞു ഉപ്പേരി, പായസം, മുറുക്ക് ഒക്കെ അയച്ചുവിട്ടു.).

സൂസൻ തന്ന ബ്രെസലട് ഞാൻ ശ്രീയുടെ കയ്യിലിട്ടു.  (എനിക്ക് മോതിരം, ബ്രെസലട് ഒന്നും ഇഷ്ടമില്ല).  രാത്രിയിൽ പ്രീതിയും പൂജയും ശ്രീയുടെ കൂടെ ഇരുന്നു ഗിഫ്റ് പാക്കറ്റുകൾ എല്ലാം പരിശോധിച്ചു. ചില സാധനങ്ങൾ പാലക്കാട് വെച്ചു, ചിലതു കോട്ടയത്തേക്കും.  ചില പാത്രങ്ങൾ ബാംഗ്ളൂരിലേക്കു കൊണ്ടുപോകാമെന്ന് മൂന്നംഗ ടീമിന്റെ അഭിപ്രായം.  പണം വന്നതെല്ലാം കൊച്ചച്ഛന്റെ കയ്യിലേക്ക് കൊടുത്തു.  പാലക്കാട്ടെ ബന്ധുക്കൾ തന്നവ താത്താവിന്റെ കയ്യിൽ കൊടുത്തു.  രമേശ് സാറും ഞങ്ങളുടെ ഫിനാൻസ് ടീമും തന്നത് വെള്ളി വിളക്കുകളുടെ സെറ്റ് ആയിരുന്നു.  അത് അച്ഛനോടും അമ്മയോടും പറഞ്ഞു താത്താവുക്കും പാട്ടിക്കും കൊടുത്തു.  പിന്നെ മോതിരങ്ങൾ, മാലകൾ കൈചെയിനുകൾ എല്ലാം കണക്കെടുത്തു അവർ തന്നെ എന്തൊക്കെയോ ചെയ്തു).

തിരക്കൊഴിഞ്ഞപ്പോൾ കൊച്ചച്ഛനും ചിറ്റയും വന്നു. എനിക്കൊരു സ്വർണ മാലയും ശ്രീക്കു രണ്ടു കാപ്പുകളും ഇട്ടു, രണ്ടുപേരും ഞങ്ങളെ കെട്ടിപ്പിടിച്ചു ഉമ്മയും തന്നു അനുഗ്രഹിച്ചു.  ഞങ്ങൾ കാലിൽ തൊട്ടു അനുഗ്രഹം വാങ്ങി.  പൂജയും പ്രീതിയും ഞങ്ങളുടെ കൂടെ ബാംഗളൂരിൽ വരുന്നുവെന്ന് പറഞ്ഞു, ഇവർ രണ്ടും ഇനി കോട്ടയത്ത് തന്നെ ഉണ്ടാവുമത്രെ.

ആളുകൾ കുറഞ്ഞതിനാൽ ഇന്നലെ കിടന്ന ചായ്പ് കിട്ടി.  ഞാൻ അവിടെ സെറ്റിൽഡ് ആയി.  പൂജയും പ്രീതിയും ശ്രീയുടെ മുറിയിലും.  (ആദിരാത്രി കണ്സപ്ട് അല്പം വ്യത്യാസമായിപ്പോയി, ഇല്ലേ? മേലേപ്പറമ്പിൽ ആൺവീട് സിനിമയിൽ ഈ ശാന്തി മുഹൂർത്തത്തെപ്പറ്റി അല്പം പറയുന്നുണ്ട്.)

എന്തായാലും അന്ന് രാത്രി യക്ഷിശല്യം ഒന്നും ഉണ്ടായില്ല.  അടുത്ത ദിവസം രാവിലെ വിളിച്ചുണർത്താൻ വന്നത് എന്റെ സ്വന്തം ശ്രീ തന്നെ.  കുളിച്ചൊരുങ്ങി പുളിയിലക്കര നേര്യതും ചുവന്ന ബ്ളവുസും ധരിച്ച എന്റെ ശാലീന സുന്ദരി.