ഒരു ബാംഗ്ലൂർ വാരാന്ത്യം 11 [Santhosh Nair] 994

കുറച്ചു ജോലികൾ എല്ലാം ഉണ്ടായിരുന്നതെല്ലാം തീർത്തു.  ജോർജിനെയും അജിയെയും അഗസ്റ്റിനെയും താജിനെയും അളിയനെയും എല്ലാം ചേർത്തൊരു കോൺഫറൻസ്.  കൂടെ സൂസനും.  സൂസന്റെ ബന്ധുക്കൾ വന്നതറിഞ്ഞപ്പോൾ എല്ലാവര്ക്കും സന്തോഷം.  അളിയൻ അല്പം തിരക്കിലായിരുന്നതിനാൽ കാൾ പെട്ടെന്നു തീർന്നു.

അഞ്ചുമണിയായപ്പോൾ മേനോൻ അങ്കിൾ വന്നു.  പ്ലാനിൽ മാറ്റം, പദ്മനാഭനും നാരായണൻ അങ്കിളും ഭാര്യയും ശനിയാഴ്ച ഉച്ചകഴിഞ്ഞു പാലക്കാടെത്തും. (കൊച്ചു കള്ളൻ എന്തോ പ്ലാനോടെയാണ് വന്നതെന്ന് എനിക്ക് പിന്നീട് മനസ്സിലായി).  വൈകിട്ട് ഏഴുമണി കഴിഞ്ഞപ്പോൾ ഷാലറ്റു പറഞ്ഞു ഒന്ന് മിനുങ്ങിയാൽ കൊള്ളാമെന്നു.  (അവൻ അങ്ങനെ കള്ളുവണ്ടിയൊന്നും അല്ല കേട്ടോ) അച്ഛനോടും കൊച്ചച്ഛനോടും അങ്കിളിനോടും സൂസനോടും പറഞ്ഞപ്പോൾ “ചലോ ബാർ” കമാൻഡ് ആണ്  കിട്ടിയത്. ഞങ്ങൾ ആർക്കാദിയ ഹോട്ടലിലേക്ക് പോയി (ഞാൻ അച്ഛൻ കൊച്ചച്ഛൻ അങ്കിൾ, ഷാലറ്റ്, അപ്പച്ചൻ). അവിടെ ഒരു റൂം എടുത്തിട്ട് ഓർഡർ അങ്ങോട്ട് കൊണ്ടുവരാൻ പറഞ്ഞു വിട്ടു.   കൂട്ടത്തിൽ അല്പം മദ്യപിക്കുന്നത് ഷാലറ്റും, അപ്പച്ചനും, അങ്കിളും ആണ്.  എല്ലാവരോടും അളവ് മീറരുത്, മഹാലക്ഷ്മിയെ ഭദ്രകാളിയാക്കരുത് എന്നൊക്കെ വാണിംഗ് കൊടുത്തു.  സാധനങ്ങൾ ഓർഡർ ചെയ്തത് കൊച്ചച്ഛനും അങ്കിളും ആണ്.  കൊണ്ടുവന്ന സ്നാക്ക്സ് (വട, മുറുക്ക്, കടല, ഉപ്പേരി) തീർക്കാൻ എല്ലാ സഹായവും ഞാൻ ചെയ്തു കൊടുത്തു.  കമ്പനിക്കു ഒരു ഗ്ലാസ് സ്‌പ്രയിട്ടും കുടിച്ചു.  അച്ഛനും കൊച്ചച്ഛനും ഇങ്ങനത്തെ ഹോട്ടലുകളിൽ ഭക്ഷണം കഴിക്കാറില്ല (വെജ് + നോൺ വെജ് / നോൺ വെജ്).  ഡ്രൈ ഗോബി മഞ്ചൂരിയൻ, ഡ്രൈ പനീർ ഫ്രൈ, ഇവയൊക്കെയായിരുന്നു ഇന്നത്തെ ഉപദംശങ്ങൾ.  തെറ്റില്ലാത്ത വിധം കഴിച്ചപ്പോൾ ഷാലറ്റു അല്പം കരച്ചിൽ തുടങ്ങി.  സൂസനോട് തെറ്റ് ചയ്തു, അവളുടെ ജീവിതം നശിപ്പിക്കാൻ നോക്കി എന്നൊക്കെ.  പിന്നെ അവനെ ആശ്വസിപ്പിച്ചു, ഒന്ന് ഉറങ്ങാൻ വിട്ടു.  ആ സമയം നോക്കി റഷ്യൻ പ്രൊഡക്ടുകളുടെ (Vodka) മേൽ വൻ ആക്രമണം നടത്തിക്കൊണ്ടിരുന്ന അങ്കിളിനെ ഭീഷണിപ്പെടുത്തി നിർത്തിച്ചു – അല്പം ബിപി (ഭാര്യാ പേടി) ഉള്ളയാളാണ് അങ്കിൾ.  പക്ഷെ ഭയങ്കര കപ്പാസിറ്റി (പട്ടാളക്കാരെ സമ്മതിച്ചിരിക്കുന്നു).

ഏഴുമണിക്ക് പോന്ന ഞങ്ങൾ തിരികെ വീട്ടിൽ എത്തുമ്പോൾ പത്തുമണി.  ആന്റിക്ക് എന്തോ ഒരു സംശയം പോലെ.  പിന്നെ ഒരു ചിരിയോടെ അകത്തേക്ക് പോയി.  രാത്രി ഭക്ഷണം കഞ്ഞിയും പയറും ചമ്മന്തിയും കപ്പപ്പുഴുക്കും മാങ്ങാ അച്ചാറും ആയിരുന്നു. ഞാൻ ഉച്ചക്ക് ഒന്നും കഴിച്ചില്ലായിരുന്നതിനാൽ നല്ല വിശപ്പ്, സമ പോളിംഗ്

സൂസന്റെ കൂടെ അപ്പച്ചനും അമ്മച്ചിയും എന്റെ റൂമിൽ കിടന്നു.  മുകളിലത്തെ നിലയിലുള്ള ബെഡ്‌റൂമിൽ ഷാലറ്റും ഭാര്യയും മോനും.  ഞാൻ മുകളിലത്തെ ഹാളിൽ കിടന്നു.  എന്തായാലും നല്ല ഉറക്കം.  നാളെ വെള്ളിയാഴ്ചയാണ്.  ഉച്ചകഴിഞ്ഞാണ്‌ പാലക്കാടിന് പോകേണ്ടത്.  ഞാനും സൂസനും അച്ഛനും അമ്മയും അങ്കിളും ആന്റിയും ഒരുമിച്ചു പുറപ്പെടും.  ഞങ്ങൾക്ക് ചില ക്ഷേത്ര സംബന്ധമായ ജോലികൾ ചെയ്തു തീർക്കാൻ ഉണ്ട്.  ശനിയാഴ്ച ഒരു ശാന്തിഹോമം താത്താ വീട്ടിൽ അറേഞ്ച് ചെയ്തിട്ടുണ്ട്.  കൊച്ചച്ഛനും ചിറ്റയും മറ്റു ബന്ധുക്കളെയും ഒക്കെ കൂട്ടിക്കൊണ്ടു ശനിയാഴ്ച രാത്രിയിൽ  വന്നോളും (സൂസന്റെ ബന്ധുക്കളും അവരുടെ കൂടെയേ വരൂ) – ഒരു ബസ് ബുക്ക് ചെയ്തിട്ടുണ്ട്.  ഞായറാഴ്ച രാവിലെയാണ് മുഹൂർത്തം.  കല്യാണം കഴിഞ്ഞു നേരെ കോട്ടയം ആണ് പ്ലാൻ.

കഴിഞ്ഞ തവണ വന്നപ്പോൾ എന്റെ കാർ ബാംഗ്ലൂരിൽ കൊണ്ടുപോയി അങ്കിളിന്റെ വീട്ടിൽ ഇട്ടിരുന്നു.  ഇപ്പോൾ ഇവിടുള്ളത് അങ്കിളിന്റെ സിക്സ് സീറ്റർ ആണ്.  അത് നന്നായി. ലഗേജും ഇത്രയും ആളുകളും എല്ലാം കൂടി കഷ്ടപ്പെട്ടേനെ.  ഞങ്ങൾ ഉച്ചക്ക് ഭക്ഷണം കഴിച്ചിട്ടിറങ്ങി (രണ്ടു മണി).  ഇടയ്ക്കു വണ്ടി ഓടിക്കാൻ ഹെല്പിന് സൂസനും മുമ്പിൽത്തന്നെ കയറി.  മറ്റുള്ളവരെല്ലാവരും യാത്രക്കിടയിൽ  ഉറങ്ങുന്നവരാണ്. ഇവൾ നിർത്താതെ വർത്തമാനം പറഞ്ഞോളും.  ജാനബാഹുല്യവും ലഗേജും കാരണം പതുക്കെയാണ് പോയത് (അറുപതിനു മുകളിൽ പോയില്ല) എന്തോ വലിയ തിരക്കില്ലാത്തതിനാൽ നാലര മണിക്കൂറുകൾ കൊണ്ട് പാലക്കാട് വീട്ടിലെത്തി.