ഉണ്ണിമോൾ ഒരു ചെല്ലക്കുട്ടി — ഉണ്ണിക്കുട്ടനും – [Santhosh Nair] 906

ഇത്രയും നേരം ഉണ്ണിമോളേ പറ്റി പറഞ്ഞിട്ട് ഉണ്ണിമോനെ പറ്റി പറയാതിരുന്നാൽ എങ്ങനെ ശരിയാകും? ഇന്നാ പിടിച്ചോ ഒരെണ്ണം.
അതിനുമുൻപ്‌ വായിയ്ക്കാൻ – വീട്ടിൽ ഇപ്പോഴും അച്ഛനും അമ്മയും നാമം ജപിയ്ക്കാറുണ്ട്, അതെങ്ങനെയാണെന്നറിയില്ല, ഒരു സീരിയൽ കണ്ടു കഴിഞ്ഞു അടുത്ത സീരിയലിനിടയിലാണ് ഇപ്പോൾ നാമജപമൊക്കെ. പണ്ടു ശിവൻ ഗണപതി, രാമൻ കൃഷ്ണൻ അയ്യപ്പൻ കാവിലമ്മ എന്നൊക്കെ ഒരു ഓർഡർ ഉണ്ടായിരുന്നു (ഞാൻ പണ്ടേ ഒരു നോൺ റെസി കേരളൈറ്റ് ആയതിനാൽ ഇടയ്ക്കു വെച്ചുണ്ടായ ചേഞ്ച് ഒന്നും അറിയില്ല). പിന്നെ കർപ്പൂര ആരതി അങ്ങനെ എന്തൊക്കെയോ ഭരണ പരിഷ്‌കാരങ്ങൾ വേറെ.

ഭക്ത ശിരോമണി ഉണ്ണിമോൻ ——

സ്‌കൂളിൽ ഹനുമാനെപ്പറ്റി ടീച്ചർ ഒരു കഥ പറഞ്ഞു കൊടുത്തത് കേട്ടപ്പോൾ ഉണ്ണിമോൻ അവന്റെ അച്ഛനോട് ഹനുമാന്റെ കഥ വീണ്ടും പറഞ്ഞു കൊടുക്കാൻ ആവശ്യപ്പെട്ടു. കഥപറയാൻ ഒട്ടും “മടിയില്ലാത്ത” എന്റെ അളിയൻ പണ്ട് ദൂരദർശനിലോ ഏഷ്യാനെറ്റ്-ലോ വന്നിരുന്ന ജയ ഹനുമാൻ സീരിയലിന്റെ കുറച്ചു റെക്കോർഡഡ് ഭാഗങ്ങൾ കാണിച്ചു കൊടുത്തു.

കുറെ ആഴ്ചകൾ കഴിഞ്ഞു ഞങ്ങൾ കുടുംബസമേതം ഒരു വലിയ അമ്പലത്തിൽ പോയിരുന്നു, അവിടെ ഗണപതി ഭഗവതി കൃഷ്ണൻ ശിവൻ രാമൻ അങ്ങനെ കുറയെ സന്നിധികൾ ഉണ്ടായിരുന്നു.

കുറച്ചൊക്കെ ശ്ലോകങ്ങൾ ഒക്കെ അറിയാമായിരുന്ന ഉണ്ണിക്കുട്ടൻ എല്ലാ സന്നിധി മുന്നിലും പോയി ശ്ലോകങ്ങൾ ചൊല്ലി വന്ദിച്ചു.

ശ്രീരാമ സന്നിധിയ്ക്കെതിരിൽ കണ്ട ഹനുമാന്റെ സന്നിധി വന്നപ്പോൾ ഒരു ചെറിയ മൗനം അവിടെ തളം കെട്ടി. ശ്ലോകങ്ങൾ ഒന്നും ഇല്ലേ എന്ന അർത്ഥത്തിൽ ഉണ്ണിമോനെ നോക്കിയ അവന്റെ അപ്പൂപ്പനെ ഒളികണ്ണിട്ടു നോക്കിക്കൊണ്ടു അവൻ ഒരു ചെറിയ ശ്ലോകം ചൊല്ലി –

“ഓം നമോ ബ്രിട്ടാനിയ അവതരിപ്പിയ്ക്കുന്ന ജയ് ഹനുമാൻ സ്വാമീ – ഞങ്ങളെ എല്ലാവരെയും രക്ഷിയ്ക്കണേ”

X —————————————- X