ഉണ്ണിമോൾ ഒരു ചെല്ലക്കുട്ടി — ഉണ്ണിക്കുട്ടനും – [Santhosh Nair] 906

3. ഈ ഉണ്ണി മോളുടെ ഒരു കാര്യം

ഞാൻ അന്നു വീട്ടിൽ വന്നു കയറുമ്പോൾ എന്നെ എതിരേറ്റതു വലിയ വായിൽ നിലവിളിച്ചു കൊണ്ടിരിക്കുന്ന ഉണ്ണിമോൾ ആണ്.

അവളുടെ പുറകിൽ എന്റെ പെങ്ങളും ഉണ്ടായിരുന്നു. അവൾ ചിരിക്കുന്നുണ്ട്
നോക്കിയപ്പോൾ പുറകിൽ നിന്ന് അച്ഛനും അമ്മയും അളിയനും എന്റെ ഭാര്യയും എല്ലാവരും കൂടി ചിരി ചിരിയോ ചിരി ചിരി… കൂട്ടച്ചിരി. ഉണ്ണിക്കുട്ടനും ചുമ്മാ ചിരിയ്ക്കുന്നുണ്ട് (അവനൊന്നും മനസ്സിലായില്ലെന്ന് എല്ലാവര്ക്കും മനസ്സിലായെങ്കിൽക്കൂടി).

എനിക്ക് ദേഷ്യം വന്നു: “എന്തിനാ എല്ലാരുംകൂടി ഉണ്ണിയെ ഇട്ടു കരയിപ്പിക്കുന്നെ?”

ഉണ്ണിമോൾ പറഞ്ഞു “ങ്ങീ…ങ്ങീ… മ്ഹ്ഹ്… അമ്മാവാ ഈ അമ്മയ്ക്കും അച്ഛനും എന്നോട് ഒട്ടും സ്നേഹം ഇല്ല..”

“അതെന്താ മോളെ അങ്ങനെ പറയുന്നേ” ഞാൻ ചോദിച്ചു.

എന്റെ കല്യാണ ആൽബം എടുത്തു കാട്ടി അവൾ പറഞ്ഞു:
“അമ്മാവന്റെ കല്യാണത്തിന് എന്നെയും എന്റെ ചേട്ടനെയും ഒക്കെ അമ്മാവൻ വിളിച്ചില്ലേ… ഈ അച്ഛനും അമ്മയും അവരുടെ കല്യാണത്തിന് എന്നെ വിളിച്ചു പോലും ഇല്ല. ഞാൻ ഇവരോട് പിണക്കമാ”.

—— ഈ ഉണ്ണി മോളുടെ ഒരു കാര്യം —-

X —————————————- X