http://imgur.com/gallery/VqKvkT3

അവളുടെ ആത്മകഥ

Avalude athmakadha | Author : Jwala

ഷാഹിന,
കിടക്കയിൽ തിരിഞ്ഞും, മറിഞ്ഞും കിടന്നു, മാനസിക സങ്കർഷവും, ദുഃഖവും ഒന്നു പോലെ, തന്റെ മനസിന്റെ ഉള്ളറയിൽ തിങ്ങി നിൽക്കുന്നത് ആരോടെങ്കിലും ഒന്ന് പറഞ്ഞില്ലെങ്കിൽ മാനസികരോഗിയാവുമോ എന്ന് പോലും ഭയപ്പെട്ടു.

ആരോട് പറയും?
വിശ്വസിക്കാൻ കഴിയുന്നവർ എത്രപേരുണ്ട്? അത് കേൾക്കുന്നവർ നാളെ എന്നേ ചൂഷണം ചെയ്യില്ലെന്ന് ആര് കണ്ടു?
തന്റെ അനുഭവങ്ങൾ അങ്ങനെയാണല്ലോ?

എന്നാൽ പിന്നെ ഒരു കഥയായി എഴുതിയാലോ? ആർക്കും ഒരു കഥ എഴുതാൻ കഴിയും, സ്വന്തം അനുഭവങ്ങൾ മാത്രം മതി…

ചിന്തകൾ നാലുപാടും ചിറകടിച്ചു പറന്നപ്പോൾ എന്റെ കഥ എഴുതിയാലോ എന്ന ചിന്ത ഉരുത്തിരിഞ്ഞു വന്നത്.

മനസ്സിനെ ശാന്തമാക്കുവാൻ ഞാനും എഴുതാൻ തുടങ്ങി എന്റെ ആത്മ കഥ…

മലബാറിന്റെ ആഢ്യതയിൽ വളർന്ന സുന്ദരി
(അതു തീരുമാനിക്കേണ്ടത് നിങ്ങളാണ്).
എല്ലാ സൗഭാഗ്യങ്ങളോടും ജനിച്ചു വളർന്നവൾ .

ഞാന്‍ പ്രശസ്തയല്ല
ലൈഗികതൊഴിലാളിയായി ജീവിച്ച കഥയോ , ചേരിയില്‍ ജനിച്ച് സമൂഹത്തിന്റെ
ഉന്നതിയില്‍ എത്തിയതൊ ആയ കഥകൾ എഴുതിയവരുടെ ഇടയിൽ വെറും നാട്ടുമ്പുറത്തുകാരിയായ എന്റെ കഥ എങ്ങനെ സ്വീകരിക്കും എന്നറിയില്ല.
മാധ്യമങ്ങളുടെ സെൻസേഷനെക്കുറിച്ചോ എനിക്കറിവില്ല. എങ്കിലും ഞാനും കുത്തിക്കുറിക്കുകയാണ് എന്റെ സംതൃപ്തിക്ക് വേണ്ടി…

എങ്ങനെയാണ് കഥ എഴുതുക?
കഥയെഴുതുമ്പോൾ സാഹിത്യം,ആലങ്കാരികത,
അതിശയോക്തി എന്നിവ വേണ്ടേ?

എങ്ങനെയാണ് തുടങ്ങുക?
ചെറു പ്രായത്തിൽ ബാപ്പ പറഞ്ഞു തന്ന കാര്യം ഓർമ വന്നു

കഥ എന്നാല്‍ എന്താണ്?
വാക്യരചനാ വിശേഷം’ എന്നാണ് ശബ്ദതാരാവലിയില്‍ ഇതിന് കൊടുത്തിരിക്കുന്ന അര്‍ത്ഥം.
അതായത് കല്പിത കഥാപാത്രങ്ങളെക്കൊണ്ട് രചിക്കുന്ന പ്രസ്താവം.

കുറച്ച് കൂടി വിസ്തരിച്ച് പറഞ്ഞാല്‍,ഒരു കള്ളം,ചിന്തയും,വികാരവും ഒരുമിച്ച് ചേര്‍ത്ത് അനുഭവമാക്കി മാറ്റുന്ന അവസ്ത്ഥയെയാണ് കഥ എന്ന് പറയുന്നത്.

വളരെ ലളിതമായി പറഞ്ഞാല്‍,കള്ളത്തരത്തിനെ
സത്യമാക്കി മാറ്റുന്ന കഴിവാണ് കഥ.

അപ്പോള്‍ ഒരു ചോദ്യം ഉയരാം.കഥ ജീവിത ഗന്ധി ആയിരിക്കണം,റിയലിസ്റ്റികായിരിക്കണം എന്നൊക്കെ പറയുന്നതോ…

അതെ;
നമ്മുടെ ചിന്തയോടൊപ്പം നമ്മള്‍ കണ്ടതും,
അനുഭവിക്കുന്നതും,
നമുക്ക് ചുറ്റും നടക്കുന്നതുമായ കാര്യങ്ങള്‍ നമ്മുടെ കാഴ്ചപ്പാടിലൂടെ അവതരിപ്പിക്കണം.
വിശദമായി എം. ടി യുടെ കാഥികന്റെ പണിപ്പുര എന്ന കഥയിൽ പ്രതിപാദിച്ചിട്ടുണ്ട്.

ഒരു എഴുത്തുകാരന്‍ അത്യാവശ്യം വായിച്ചിരിക്കേണ്ട പുസ്തകമാണ്
“ആയിരത്തൊന്ന് രാവുകള്‍” എന്ന അറബി കഥകൾ, അതിലെ കഥാപാത്ര സൃഷ്ടിയും,
ഒരു കഥയെ മറ്റൊന്നുമായി ബന്ധിപ്പിച്ചിരിക്കുന്നതും എല്ലാം
എഴുതാന്‍ തുടങ്ങുന്ന ഒരു വ്യക്തിക്കുകിട്ടുന്ന ബാലപാഠമാണ് ഈ കൃതി എന്ന് ബാപ്പ പറഞ്ഞു തന്നത് ഓർമ വന്നു .