അപരാജിതൻ -39 5341

ഹോട്ടലിൽ

മനു ചെന്ന സമയം മയൂരിയെ കണ്ടു.

അവളവനെ നോക്കി പുഞ്ചിരിച്ചു

“സർ ,,,എന്തായി പോയിട്ട് ?”

“ഒരു രക്ഷയുമില്ല മയൂരി , നടന്നു കാൽ കഴച്ചതു മിച്ചം ” അവൻ നടന്നത് എല്ലാം മയൂരിയോട് പറഞ്ഞു.

“കാലൊക്കെ ഉരഞ്ഞുപൊട്ടിയേക്കുവാ,,നാളെ പോകാൻ പറ്റുമോ എന്നറിയില്ല , വരും വഴി ഓയിന്മെന്റ് വാങ്ങിയിട്ടുണ്ട്”

“കഷ്ടമായല്ലോ,,, ”

“കുഴപ്പമില്ല മയൂരി ,,എന്തായാലും ഇറങ്ങിതിരിച്ചതല്ലേ ,,കണ്ടത്താതെ പോകില്ല”

“സർനു കാപ്പി പറയട്ടെ ”

“ഓ,,കിട്ടിയാൽ സന്തോഷം ”

മയൂരി ഉടനെ ഫോൺ വിളിച്ചു അങ്ങോട്ടേക്ക് കാപ്പി പറഞ്ഞു

പത്തു മിനിറ്റു കൊണ്ട് കാപ്പി വന്നു .

മനു അത് ഒരു കവിൾ ഇറക്കി

“സർ ,,ഞാനൊരു സജഷൻ പറയട്ടെ ”

“പറഞ്ഞോളൂ ”

“സ൪ , ഇങ്ങനെ അന്വേഷിക്കുന്നതിലും നല്ലത് അവിടെയുള്ള പോസ്റ്റ് ഓഫീസിലോ അല്ലെങ്കിൽ റേഷൻ ഷോപ്പിലോ അതുമല്ലെങ്കിൽ വാർഡ് മെമ്പറുടെ  അടുത്തോ ആ പ്രദേശത്തുള്ള കടകളിലോ  അന്വേഷിക്കുന്നതല്ലേ നല്ലത്, അവർക്ക് ആ പ്രദേശത്തെ കുറിച്ച് നല്ല അറിവുണ്ടാകുമല്ലോ, അല്ലാതെ ഇങ്ങനെ ഓരോ ഇടവഴികൾ കയറി അന്വേഷിക്കുന്നത് പ്രാക്ടിക്കലായ കാര്യമല്ല”

മനു അതിനെകുറിച്ചു ശരിക്കും ആലോചിച്ചു.

“അല്ല മയൂരി ,,കടകൾ ഒന്നും ഞാൻ പോയിടത്ത്  കണ്ടില്ല , അതുപോലെ ബാലുച്ചേട്ടൻ വല്ല വാടകയ്ക്കുമാണ് താമസിക്കുന്നതെങ്കിലോ ”

“കുറെ നാളായി ഒരു പ്രദേശത്തു താമസിച്ചാൽ എങ്ങനെയായാലും പോസ്റ്റ് ഓഫീസിൽ അറിയാല്ലോ , പിന്നെ കടകളിൽ  സാധനം വാങ്ങുവാൻ പോകില്ലേ, മൊബൈൽ റീ ചാർജ് ചെയ്യില്ലേ കടയിൽ പോയി ”

“ഹമ് ,,,എന്നാ നാളെ അങ്ങനെ അന്വേഷിച്ചുനോക്കാം ”

“അല്ല ബാലുച്ചേട്ടന്റെ വീട്ടിൽ ആരൊക്കെയുണ്ട് ?”

“അച്ഛൻ ‘അമ്മ അനിയൻ എന്നാ എന്നോട് പറഞ്ഞിട്ടുള്ളത്”

“ഓക്കേ …എന്തായാലും നാളെ ഈ രീതിയിൽ കൂടെ അന്വേഷിച്ചു നോക്കൂ എന്തേലും വിവരം കിട്ടാതെയിരിക്കില്ല ”

“ഹമ് ,,,, അങ്ങനെ തന്നെ നോക്കാം ”

മനു അവളോട് യാത്ര പറഞ്ഞു മുകളിലേക്ക് കയറി. നല്ല ക്ഷീണമുള്ളതിനാൽ അവൻ ചെന്ന പാടെ കുറച്ചു നേരം കിടന്നു, ഒരു മണിക്കൂർ കഴിഞ്ഞപ്പോൾ എഴുന്നേറ്റ് വീട്ടിലേക്ക് വിളിച്ചു , അനുപമയെ വിളിച്ചു വിവരങ്ങൾ  എല്ലാം പറഞ്ഞു കുളിച്ചു ഭക്ഷണം കഴിച്ചു വീണ്ടും കിടന്നു.

@@@@