അപരാജിതന്‍ 33 [Harshan] 8008

അതെ സമയം ,

നല്ല മുത്തുവിന് ശങ്കരനെയും ശിവാനിയെയും കണ്ടാൽ ശിവശൈലത്തെ ആളുകളാണെന്നു അറിയാ൯ സാധിക്കും , പക്ഷെ അയാൾക്ക് ബോധമില്ലാത്തതു കൊണ്ടും ഇനി ബോധം വന്നാൽ മറവി വരാൻ സാധ്യത ഉള്ളത് കൊണ്ടും ഒരു വിവരവും അയാളിൽ നിന്നും കിട്ടുവാനും സാധ്യതയില്ല.

“തിമ്മയ്യ൯ മുതലാളി ,, നിങ്ങളെയാരോ പിന്തുടരുന്നുണ്ട്,, ഇപ്പോൾ കണ്ടില്ലേ നല്ല മുത്തുവിനെ ആക്രമിച്ചു കൊണ്ട് നിങ്ങൾക്കൊരു വാണിങ് തരുന്നതാണോ എന്ന് ഒരു സംശയമുണ്ട് ”

ഗുണശേഖര൯ ഒരു സംശയം പോലെ അവരിരുവരോടും പറഞ്ഞു.

“യാരന്ത പൊറംപോക്ക് നായ്, ,,അന്ത സര്‍ക്കാര്‍  അവനെ സുമ്മാ വിടക്കൂടാതെടാ ”

“എന്‍റെ തിമ്മയ്യ൯ മുതലാളി നിങ്ങളെന്താ ഈ പറയുന്നത് , അവനാരെന്നറിഞ്ഞാലല്ലേ ചുമ്മാ വിടണോ അതോ വല്ലതും കൊടുത്ത് കൊണ്ട് വിടണോ എന്ന് തീരുമാനിക്കേണ്ടത് ,, ”

“ഡെയ് ..ഡെയ് …ഡെയ് ,,നീയൊരു കാവൽ തുറൈ അധികാരിയാടാ …? ഇത് യാര് സെയ്ത് എന്റ് കണ്ടുപിടിപ്പത് ഉന്നോടെ പൊറുപ്പ് താനേ ,, ഉങ്കെ വേലൈ സെരിയാ സെയ്‌ …”

കോപത്തോടെ തിമ്മയ്യ പറഞ്ഞു

ഇതുവരെ മറഞ്ഞിരുന്നു തന്നെ ആക്രമിക്കുന്നത് ആരെന്നു കണ്ടു പിടിക്കാൻ പൊലീസിന് സാധിക്കാത്തതിന്‍റെ  ചൊരുക്ക് അയാളിൽ നല്ലപോലെ ഉണ്ടായിരുന്നു.

“തിമ്മയ്യൻ മുതലാളി ,,ഞങ്ങൾ ഞങ്ങളുടെ വേല നല്ലപോലെ ചെയ്യുന്നുണ്ട് , ഒരു തെളിവും കിട്ടാതെ ഞങ്ങൾ എവിടെ പോയി  ആരെ അന്വേഷിക്കും ”

“ഡേയ് ,,,,അന്ത സിവസൈലത്ത് പോയി പാരെടാ ,,”

“നിങ്ങളൊക്കെ ഒരു തവണ ശിവശൈലത്ത് കയറിയതിൻറെയാണ് തലയില്ലാതെയും കൈകാലുകൾ ഇല്ലാതെയും ആസനത്തിൽ  കമ്പി കയറ്റിയും ശവങ്ങൾ കണ്ടത് ,,ഇനിയും റിസ്ക് എടുക്കണോ ,,എനിക്ക് സാധിക്കില്ല, ഈ വലിഞ്ഞു കയറി വന്ന വധൂരി സര്‍ക്കാരിന്‍റെ ബലത്തില്‍ അവിടത്തെ ഞാഞ്ഞൂലുകള്‍ വരെ തലപൊക്കി തുടങ്ങി” ഗുണശേഖരന്‍ പറഞ്ഞു

“അപ്പൊ എന്നാ സെയ്‌വെൻ ?” മാവീര൯ ചോദിച്ചു

“ഒന്നും ചെയ്യാനില്ല ,, നമ്മൾ സൂക്ഷിക്കണം , ഇനിയൊരു പ്രകോപനത്തിനും നിൽക്കണ്ട ,,തത്കാലം ഇങ്ങനെയങ്ങു പോകട്ടെ ,, നമ്മുടെ പുറകിൽ പോലും ആരെങ്കിലും ഉണ്ടാകുമോ എന്ന് പോലും സംശയിക്കേണ്ട അവസ്ഥയിലാ ”

അതുകേട്ടു മാവീരനും തിമ്മയ്യനും മുഖത്തോടു മുഖം നോക്കി

“നിങ്ങൾ ഇനി ചന്തയിലേക്ക് പോകണ്ട , അതുപോലെ മാവീരാ താൻ കമ്മോർവാഡയിൽ തൻറെ പണികളും നോക്കിയിരുന്നാൽ മതി ,, എല്ലാവരെയും ഒന്ന് ജാഗ്രതയാക്കി ഇരുത്തണം ”

അപ്പോളേക്കും ഡോക്ടർ വന്നു

അവരെ മൂന്നുപേരെയും ഐ സിയുവിൽ കയറാൻ അനുവദിച്ചു.

അവിടെ ചെന്ന് നോക്കുമ്പോൾ നല്ലമുത്തുവിന് മൂത്രം പോകാൻ കുഴൽ ഇട്ടിട്ടുണ്ട്

മുഖം നീര് കെട്ടി പന്ത് പോലെയായി കിടക്കുന്നു