അപരാജിതന്‍ 33 [Harshan] 8011

“എനിക്ക് അപ്പൂനെ ഒരുപാട് മിസ്സ് ആകുന്നു,,കണ്ണാ ,,, എന്നോട് ഇഷ്ടമുണ്ടെ ഒന്ന് കാണിച്ചു തരുമോ ?”

അവൾ കണ്ണനോട് ചോദിച്ചു

നല്ലപോലെ മയക്കം വരുന്നതിനാൽ അവൾ അല്പം വലത്തേക്ക് ചരിഞ്ഞു കിടന്നു.

മുറിയിൽ മെല്ലെ വീശുന്നയിളംകാറ്റിലവളുടെ നെറ്റിയിലേക്ക് ചാഞ്ഞു കിടന്ന അളകങ്ങൾ മെല്ലെയിളകുന്നുണ്ടായിരുന്നു .

മന്ദമാരുതന്‍റെ തഴുകലിൽ അവൾ നിദ്രയിലേക്ക് പാദം വെച്ചിരുന്നു.

*******(((()))))******

കോടമഞ്ഞു നിറഞ്ഞ ഒരു സായാഹ്നം.

ഒരു ഇടവഴിയിലൂടെ  പട്ടുചേലയും  ആടയാഭരണങ്ങളുമണിഞ്ഞ പാർവ്വതി നടക്കുകയാണ്.

എവിടെയെക്കെന്നറിയാതെ

ഇരുവശത്തും നിറയെ അന്ന് രാത്രി വിരിയാൻ വെമ്പിനിൽക്കുന്ന ഗന്ധരാജ പൂമൊട്ടുകളും മുല്ല മൊട്ടുകളും നിറഞ്ഞ ചെടികൂട്ടങ്ങൾ.

പെട്ടെന്നവളുടെ ഇടത്തെ കൈയിൽ ഒരു കൈ മുറുകി.

അവൾ നോക്കുമ്പോൾ തനിക്കരികിലായി തൻറെ അപ്പു

ചന്ദനനിറമാർന്ന തറ്റുടുത്ത കസവ് നീളൻ മുണ്ടും ഉത്തരീയവും കഴുത്തിൽ നിരവധി മുഖങ്ങളുള്ള രുദ്രാക്ഷവും , വിരൽ വണ്ണമുള്ള സ്വർണ്ണമാലയും അതിൽ ലോക്കറ്റ് പോലെ വെള്ളിയിൽ വജ്രം പതിച്ച പുലിനഖവും.

അപ്പോളാണ് അവൾ മനസിലാക്കിയത് താൻ വിവാഹവേഷത്തിലാണെന്ന്.

കഴുത്തിൽ മംഗല്യസൂത്രവുമണിഞ്ഞിരിക്കുന്നു.

തങ്ങൾ നടക്കുന്ന വഴിയിൽ പൂക്കൾ വിതറിയിരിക്കുന്നു.

ചുറ്റുമുള്ള നാട്ടുകാർ തങ്ങളെ നോക്കി ഭയഭക്തി ബഹുമാനങ്ങളോടെ വണങ്ങുന്നു.

അപ്പുവിന്‍റെ കൈ പിടിച്ചു പാർവതി ചെന്ന് കയറിയത്

മുൻപ് താൻ സ്വപ്നത്തില് കണ്ട വലിയൊരു മാളികയുടെ പടിപ്പുരയിലായിരുന്നു.

അവർ അവിടെ അല്പം നേരം കാത്ത് നിന്നപ്പോൾ

പടിപ്പുര വാതിൽ തുറന്നു

പ്രാർത്ഥിച്ചു കൊണ്ട് വലം കാൽ വെച്ച് പടിപ്പുര കടന്നു ഒപ്പം അപ്പുവും

തൻറെ കണ്മുന്നിൽ കാണുന്നത് പൗരാണികമായ അതി മനോഹരമായ മാളികയാണ്.

അവിടെയും നിരവധി ബന്ധുക്കൾ

ഇരുവശത്തും നിന്നും അവർക്കു മേൽ പൂക്കൾ വർഷിക്കുന്നു.

അവർ ഒരുമിച്ചു മാളികയുടെ പടിയ്ക്ക് മുന്നിൽ വന്നു നിന്നു.

മുന്നിലായി അഞ്ചു തിരിയിട്ട സ്വർണ്ണ നിലവിളക്ക് കൈയിൽ പിടിച്ചു ലക്ഷ്മിയമ്മ ഒരു പുഞ്ചിരിയോടെ നിൽക്കുന്നു.

സമീപം ജയദേവൻ അങ്കിൾ , അല്ല ,,അച്ഛൻ ,,

അവർക്കു സമീപം താലം പിടിച്ചു സുന്ദരികളായ പെൺകുട്ടികൾ

അവരുടെ ബന്ധുക്കൾ.

അപ്പോൾ മധ്യവയസ്ക്കയായ മറ്റൊരു ‘അമ്മ ആരതിയും കൊണ്ട് അങ്ങോട്ടേക്ക് വന്നു.

എവിടെയോ കണ്ട നല്ല മുഖ പരിചയ൦ അവൾക്കു തോന്നി