അപരാജിതന്‍ 33 [Harshan] 8002

കസ്തൂരി പകച്ചു കൊണ്ട് അവനെ നോക്കി

“ചേച്ചി പറഞ്ഞോളൂ ,, ചേച്ചിയുടെ അഭിപ്രായമാണ് എനിക്കറിയേണ്ടത് ”

“വേണ്ട അനിയാ ,, എന്‍റെ  അനിയനൊരു പകരക്കാരനാവണ്ട ,,അങ്ങനെയൊരു  അവസ്ഥ അനിയന് വന്നിട്ടില്ല ”

ആദി അതുകേട്ട് പുഞ്ചിരിച്ചു.

“ഞാനിങ്ങനെ ജീവിക്കട്ടെ ,,എന്‍റെ  ഇഷ്ടം പോലെ,,,തിരികെ ചെന്നാലും ഇതേ അടിമജീവിതം  തുടരേണ്ടവൻ തന്നെയാ ,,അച്ഛനെ കണ്ടു പിടിക്കണം സത്യം  തെളിയിക്കണം എന്നിട്ടു അച്ഛനുമായി അച്ഛന്‍റെ നാട്ടിലേക്കു പോകണം,,അതെവിടെ എന്ന് ഇപ്പോൾ പറയുന്നില്ല ,,ശിഷ്ടകാലം അവിടെ ,, എന്തെങ്കിലും ബിസിനസ് ചെയ്യണം , പിന്നെ ഒരു കുടുംബം ,,ആ ഒക്കെ നടക്കും,,,നടക്കാതെ എവിടെ പോകാനാ ,,,”

“എന്നാലൂം ആ കുട്ടിയെ ഓർക്കുമ്പോൾ വല്ലാത്തൊരു  സങ്കടമുണ്ട് അനിയാ ”

“ചേച്ചി,,,ജീവിതത്തിലെ ചില തീരുമാനങ്ങള്‍ അത് എടുത്താല്‍ പിന്നെ ജീവിതകാലം മുഴുവനുമുള്ളതാ,, അങ്ങനെ നോക്കുമ്പോൾ ആ കുട്ടിയെടുത്തത്  ഏറ്റവും നല്ല തീരുമാനമാണ് ,,അത് അങ്ങനെ തന്നെ നിലനിന്നോട്ടെ ,, വിവാഹമൊക്കെ കഴിഞ്ഞതിനു ശേഷമാണ് ഇങ്ങനെ തോന്നുന്നതെങ്കിലോ അപ്പോൾ താലി കെട്ടിയ പുരുഷനെ കളഞ്ഞു വരുമോ ?”

“ഇല്ലനിയാ ,,, അങ്ങനെയൊരിക്കലും സംഭവിക്കില്ല ,, ”

“അത്രേയുള്ളൂ , വരുന്ന ചിങ്ങത്തിൽ അവളുടെ വിവാഹമാണ് ,, ക്ഷണമുണ്ടാകും ,,പക്ഷെ അതിനു മുൻപ് തന്നെ എൻറെ അച്ഛനെ കണ്ടത്തി അവിടെ നിന്നും യാത്ര പറയണം ,,അതുമാത്രമാ ഇപ്പോളുള്ള ഏറ്റവും വലിയ ആഗ്രഹം”

“അതൊക്കെ പോട്ടെ ചേച്ചി ,, ഞാനിന്നു ഇവിടെ തന്നെയുണ്ടാകും ,, എന്‍റെ  സുഹൃത്തുക്കളെ ഞാൻ ജില്ലാ ആശുപത്രിയിൽ ഏർപ്പാടാക്കിയിട്ടുണ്ട്  അവർ ഉമാദത്തൻ മാമനും ബാലവർ അണ്ണനും വേണ്ട സഹായങ്ങൾ ചെയ്തോളും ,, ശൈലജ എന്നോട് നല്ല ദേഷ്യത്തിലാ,,പാവം ,, അതാ ഞാൻ അങ്ങോട്ട് പോകാത്തത് ”

“അപ്പൊ ശരി ചേച്ചി ,,ഞാനെന്നാ കുളിക്കാൻ പോകട്ടെ ,,, ”

എന്നുപറഞ്ഞു ആദി അവിടെ നിന്നും പ്രഭാതകൃത്യങ്ങൾക്കായി തിരിച്ച നേരം

“അനിയാ ,,,,” എന്ന് കസ്തൂരി അവനെ വിളിച്ചു

“എന്താ ചേച്ചി ” തിരിഞ്ഞുകൊണ്ടവൻ ചോദിച്ചു

“ആ ചിത്രത്തില്‍  മൂവരും നിൽക്കുമ്പോൾ അനിയന് അഴക് കുറവാ ,

പക്ഷെ ഇപ്പോൾ,,ഇപ്പോള്‍, എൻറെ മുന്നിൽ നിൽക്കുന്ന അനിയനൊപ്പം ആ  രാജകുമാരൻ വന്നു നിന്നാൽ ഞാൻ മാത്രമല്ല ഈ ഗ്രാമം മൊത്തം പറയും, ആണിന്‍റെ അഴക് , അതെന്‍റെ  ഈ അനിയന് മാത്രമുള്ളതാ,,കാരണം അറിവിനെ അഴകാക്കിയ ശിവന് മുന്നിൽ വേറെയൊരു അഴകുണ്ടോ ???അയാൾ രാജകുമാരനാണെങ്കിൽ എൻറെ അനിയൻ സര്‍ക്കാര്‍ എന്ന ചക്രവര്‍ത്തിയായി  നിൽക്കയല്ലേ ,,”

വിതുമ്പിക്കൊണ്ട് കസ്തൂരി പറഞ്ഞു