അപരാജിതന്‍ 20 [Harshan] 10038

പിറ്റേന്ന്

മനു ഓഫീസിൽ പോയി അവിടത്തെ കാര്യങ്ങൾ ഒക്കെ ശ്രദ്ധിച്ചു തുടങ്ങി.

ഉച്ച കഴിഞ്ഞവൻ ടൗണിലുള്ള അവരുടെ പെട്രോൾ പമ്പിലേക്കു പോയി

അവിടത്തെ കാര്യങ്ങൾ ഒക്കെ ചെയ്തു കാറും കൊണ്ട് തിരികെ വരുന്ന വഴി

സെയിന്റ് സ്റ്റീഫൻ കോളേജ് കണ്ടു

അവിടെയാണ് അനുപമ പഠിക്കുന്നത്

അവൻ കോളേജിന് പുറത്തു അല്പം നീങ്ങിയുള്ള റെയിൽവേ പാലത്തിനു അടുത്തായി കാർ  പാർക്ക് ചെയ്തു.

ബസ് സ്റ്റോപ്പ് അവിടെ നിന്നും അല്പം മുന്നോട്ടു മാറിയാണ്

കോളേജ് വിട്ടുകഴിഞ്ഞപ്പോൾ മനു അനുപമയെ വിളിച്ചു

അവളുടെ മൊബൈൽ സൈലന്റ്ലാകുമെന്നു അവൻ കരുതി , കാരണ൦ ഫോൺ എടുക്കുന്നുണ്ടായിരുന്നില്ല

ഒന്നുരണ്ടു വട്ടം വിളിച്ചപ്പോൾ അവൾ ഫോൺ എടുത്തു

“മനുവേട്ടാ ”

അവളുടെ വിളികേട്ടപ്പോൾ തന്നെ അവന്‍റെ ഉള്ളം കുളിർത്തു

“അനു ,,ഞാൻ ആ പാലത്തിനു അടുത്തുണ്ട് , കാറും ഉണ്ട് ,,ഞാൻ അനുവിനെ വെയിറ്റ് ചെയ്യുകയാ ”

“മനുവേട്ട,,ഞാൻ വന്നു കൊണ്ടിരിക്ക്യാ ”

“ശരി ,,ഞാൻ വെയ്റ്റ് ചെയ്യാം ”

എന്ന് പറഞ്ഞു അവൻ ഫോൺ വെച്ചു

അഞ്ചുമിനിറ്റ് കഴിഞ്ഞപ്പോളേക്കും അനുപമ കൂട്ടുകാരികളോടൊപ്പം അവിടെയെത്തി

അവൾ  അവരോടു പറഞ്ഞു കാറിൽ കയറി

“മനുവേട്ടാ ,,,എന്തൊക്കെ ഉണ്ട്? ”

“ഉള്ളതൊക്കെ പറയാം ,,ഞാൻ വണ്ടി എടുക്കട്ടേ ,,, ഇല്ലേ എപ്പോളാ കിറുക്കൻമാർ വരിക എന്ന് പറയാൻ പറ്റില്ല”

“കിറുക്കന്മാരോ ?”

“സോറി ,,അത് പൊലീസുകാരെ പറയുന്നതാ ”

“ഓ അങ്ങനെ ,,അവൾ ചിരിച്ചു

മനു വണ്ടിയെടുത്തു

“ഇന്നലെ വന്നല്ലേ ,,മനുവേട്ടാ ”

“ആ ,,, ഞാൻ ഇന്നലെ വിളിച്ചിരുന്നല്ലോ ,, അനുവിന്‍റെ ഫോൺ സ്വിച്ഡ് ഓഫ് ആയിരുന്നല്ലോ ”

“ആ ,,മൊബൈലിനു ചാർജിങ് ഇഷ്യു ഉണ്ട് ,,അതാ ”

“ഓ ,,,ഇപ്പോ ശരി ആയോ ”

“ആ കുഴപ്പമില്ല മനുവേട്ടാ ,,,”

അവർ കുറച്ചു ദൂരം മുന്നൊട്ടു പോയി ഒരു റെസ്റ്റോർന്റിൽ വണ്ടിയൊതുക്കി

“നമുക് ,,ലൈറ്റ് ആയി എന്തേലും കഴിച്ചു പോയാൽ പോരെ അനു ”

“അയ്യോ ,,വൈകില്ലെ മനുവേട്ടാ ”

“ഓ..പതിനഞ്ചു മിനിറ്റിന്‍റെ കാര്യമല്ലേ ഉള്ളു ,,ഇങ്ങു വാ അനു ”

അവൻ അനുപമയെയും വിളിച്ചു കൊണ്ട് റെസ്റ്റോറന്റ് ലേക്ക് കയറി

അവിടെ രണ്ടു ബട്ടർ സ്കോച് ഷേക്ക് പറഞ്ഞു

ഷേക്കിനായി കാത്തിരുന്ന സമയം അവ൯ തലേന്ന് നടന്നതൊക്കെ അനുപയോട് പറഞ്ഞു

എല്ലാം കേട്ട് അവളാകെ അതിശയിച്ചിരിക്കുകയായിരുന്നു

“സത്യാണോ മനുവേട്ടാ ഇതൊക്കെ ” ആശ്ചര്യത്തോടെ അവൾ ചോദിച്ചു

“ഞാൻ കള്ളം പറയുമോ അനു ”

“ശോ ..എന്നാലും ഇതെന്തൊക്കയാ ഈ കേൾക്കണേ ,,,, അപ്പൊ അപ്പുവേട്ടൻ എവിടെയോ ഉണ്ട് ,,അതും ബാലുച്ചേട്ടന്‍റെ ഒപ്പം ,,, അല്ലെ ,,,മനുവേട്ടാ ”

“അതെ അനു ,,,,”

“അപ്പോ…പാറു ചേച്ചി എവിടെയാ ,,, അപ്പുവേട്ടന്‍റെ ഒപ്പം ഇല്ലാന്ന് മനസ് പറയുന്നു ”

“അതെനിക്കും തോന്നുന്നുണ്ട് അനു ,,,പക്ഷെ ഇവരുടെ ഇടയിൽ എന്താണ് നടന്നത് എന്ന് മാത്രം മനസിലാകുന്നില്ല ”

“അല്ല ഇനിയിപ്പോ വൈഗയും അപ്പുവേട്ടനും കല്യാണം കഴിഞ്ഞു കാണണം ,,അതുപോലെ പാറുവേച്ചിയും ആ ശിവയും കല്യാണം കഴിച്ചിട്ടുണ്ടാകണം ,,” അല്പം സങ്കടത്തോടെ അവൾ പറഞ്ഞു

“അങ്ങനെ സ൦ഭവിക്കോ ,,, അനു ,,,ഇല്ല അങ്ങനെ തോന്നുന്നില്ല ,,ശിവശൈലത്തു എന്ത് നടന്നു എന്നത് ഇനിയല്ലേ അറിയാൻ പോകുന്നത് ,,അതിനായി ബാലുച്ചേട്ടനെ കാത്തിരിക്കുകയാണ് ..”

“ഈ ബാലുച്ചേട്ട൯ ഒന്ന് വേഗം വന്നിരുന്നെങ്കിൽ ,,,സത്യം പറഞ്ഞാ എനിക്ക് ആകെ വട്ടു പിടിക്ക്യാ മനുവേട്ടാ …അതുപോട്ടെ ,,ആ കൂവളത്തില കൊണ്ട് വന്നിട്ടുണ്ടോ ”

“ആ ,,,ഉണ്ട് ,,,” അവൻ ഷർട്ടിന്‍റെ പോക്കറ്റിൽ നിന്നും കവറിൽ സൂക്ഷിച്ച കൂവളത്തില കാണിച്ചു

അവൾ അത് കൈയിൽ വാങ്ങി

ഇരുകണ്ണുകളിലും ഒന്ന് തൊട്ടു തൊഴുതു

“ഇതെനിക്ക് തരുമോ മനുവേട്ടാ ?”അവൾ ചോദിച്ചു

“എന്തിനാ ,,അനു ”

“എന്‍റെ മുറിയിൽ ,,മഹാദേവന്‍റെ ഫോട്ടോയുടെ അരികിൽ വെക്കാനാ ,,,എനിക്കെന്നും തൊട്ടു തൊഴാല്ലോ ”

“അവനല്പം നേരം ആലോചിച്ചു

“മനുവേട്ടന് ബുദ്ധിമുട്ടുണ്ടെങ്കിൽ വേണ്ടാട്ടോ ”

“അയ്യോ ,,,ഇല്ല ,,,,അനു ,,പക്ഷെ വേറെ ആർക്കും കൊടുക്കരുത് ,,”

“അയ്യോ ,,ഞാനാർക്കു൦ കൊടുക്കില്ല ,,,ഞാൻ സൂക്ഷിച്ചു വെക്കും ”

‘എന്നാ ,,അനു എടുത്തോ ”

അത് കേട്ടപ്പോൾ അനുപമയ്‌ക്ക് വല്ലാത്ത സന്തോഷം നിറഞ്ഞു

അപ്പോളേക്കും ഷേക് വന്നു

അവൾ കൂവളപത്രം ബാഗിൽ അവൾ സൂക്ഷിച്ചിരുന്ന ശിവസഹസ്രനാമം പുസ്തകത്തിനിടയിൽ എടുത്തു വെച്ചു.

അവർ ഷേക്ക്‌ കുടിക്കാൻ തുടങ്ങി

മനു അനുപമയെ തന്നെ നോക്കി ഇരികുകയായിരുന്നു

“മനുവേട്ടൻ കുടിക്കുന്നില്ലേ ”

“ഓ സോറി ,,,’

അവൻ കുടിക്കാനാരംഭിച്ചു

അവൻ ഇടയ്ക്കിടെ അനുപമയെ നോക്കികൊണ്ടിരുന്നു

മനസിന് ഒരുപാട് സന്തോഷം ലഭിക്കുന്നു അവളെ നോക്കിയിരിക്കുമ്പോൾ

അവൾ ഒന്ന് ഒളികണ്ണിട്ടു മനുവിനെ നോക്കി

അപ്പോൾ അവൻ കണ്ണുവെട്ടിച്ചു ഷേക്ക് കുടിച്ചു കൊണ്ടിരുന്നു