വിരൽത്തുമ്പിലെ പെണ്ണ്

Viralthumbile Pennu | Author : Achillies

ഇതൊരു കഥയായി കൂട്ടാമോ എന്നൊന്നും അറിയില്ല….
തലയിൽ കിടന്നു തിരിഞ്ഞു സമാധാനം തരതായപ്പോൾ ഒന്നിറക്കി വെച്ചു….
തെറ്റുകൾ ഉണ്ടെങ്കിൽ ക്ഷെമിക്കുക….

“ഇന്ന് നല്ല മൂടിലാണെന്ന് തോന്നുന്നു…..മാഡം എഴുത്തിലാണല്ലോ……”

” ആഹ് ഇന്ന് എന്താന്ന് അറിയില്ല ഓരോ കാര്യങ്ങൾ തലയിൽ കയറിയപ്പോൾ എഴുതി ഇറക്കാം എന്ന് കരുതി, അല്ല മാഷും നേരത്തെ ആണല്ലോ……”

“ആളുകൾ കുറവായിരുന്നു സൊ നേരത്തെ പോന്നു…..
…….നിനക്ക് കോഫി വേണോ,……ഞാൻ എന്തായാലും ഒന്നിടാൻ പോവുവാ….”

“ഹ്മ്മ്….”

എന്റെ മുടിയിലും ഒന്ന് തഴുകി അകത്തേക്ക് കയറിപ്പോയ അഹ് മനുഷ്യനാണ് ഇപ്പോഴെന്റെ എല്ലാം…

വീണുപോയിടത്തു നിന്നും എന്നെ താങ്ങി ഉയർത്തിയ എന്റെ പാതി എന്ന് പറയുന്നതിലും നല്ലത് എന്റെ പൂർണത എന്ന് പറയുന്നതാവും.
എന്നെ അറിയാൻ അധികമൊന്നും തേടേണ്ട ഒരു സമയം ഫോണിലും ഹാർഡ് ഡിസ്കുകളിലും ഇന്റർനെറ്റിലൂടെയും വികാരം തിളപ്പിക്കാനുള്ള ഒരവസരം ഞാൻ ഒരിക്കൽ വിശ്വസിച്ചിരുന്ന, സ്നേഹിച്ചിരുന്ന ഒരാൾ മൂലം എനിക്കും കൈ വന്നിട്ടുണ്ട്.

അന്ന് ഞാൻ ആയിരുന്നെങ്കിൽ ഇന്ന് എന്റെ സ്ഥാനത് മറ്റൊരാൾ വന്നിട്ടുണ്ടാവും എന്നെനിക്കറിയാം.

ഒരു നാട്ടിൻ പുറമായിരുന്നു എന്റെ ലോകം, ചിറകു വച്ച് ആഹ് ലോകം നഗരത്തിലേക്ക് കൂടി വിടർത്തി തന്നത് എന്റെ അപ്പനായിരുന്നു, ഡിഗ്രി ചെയ്യാൻ നാട്ടിൽ കോളേജ് ഇല്ലാതിരുന്നപ്പോൾ എന്നെ നാഗരികതയിലേക്ക് പറിച്ചു നട്ടു…..
തുടക്കത്തിലുള്ള പേടി പതിയെ കൗതുകത്തിലേക്കും പിന്നീട് ആസ്വാദനത്തിലേക്കും മാറിയപ്പോൾ ഞാൻ തികച്ചും നഗരത്തിന്റെ പുത്രിയായി മാറി..
ഇടയ്ക്കെപ്പോഴോ തോന്നിയ ഒരു കുസൃതിയും മറ്റുള്ളവർക്ക് ഉള്ളത് കണ്ടു കൊണ്ടുള്ള അസൂയയും കൂട്ടിനു വന്നപ്പോൾ എന്റെ നേരെ നീട്ടിയ ഒരു റോസാപ്പൂവിന് ഞാനും മറുപടി കൊടുത്തു.
ബാക്കിയുള്ളവരുടെ പ്രണയത്തിന് ഒരു പച്ചിലയുടെ ആയുസ്സ് പോലും ഇല്ലാതെ കൊഴിഞ്ഞു വീഴുമ്പോൾ എന്റേത് പൂത്തു തളിർക്കാൻ ഞാൻ ഏതറ്റം വരെയും പോകാൻ തയ്യാറായി.