ഹൃദയരാഗം 17 [Achu Siva] 663

അല്ല   ഞാൻ അങ്ങനെയൊന്നും ….വാസുകി വാക്കുകൾ കിട്ടാതെ അവിടെ നിന്നു ഉരുകി .

വാസുകി ,നമുക്ക് പിന്നീട് സംസാരിക്കാം …എനിക്ക് അൽപ സമയം ഒന്നു ഒറ്റക്കിരിക്കണം …അയാൾ അവളിൽ നിന്നും അകന്നു മാറി മുന്നിലേക്ക് നടന്നു പോയി …

അയാൾ പറഞ്ഞ വാക്കുകൾ ഓർത്തു അവൾക്കു അവളോട്‌ തന്നെ എന്തെന്നില്ലാത്ത പുച്ഛം തോന്നി …അവൾ വീടിനുള്ളിലേക്ക് നടന്നു …നടത്തിനിടയിലും പല തവണ അവൾ അയാളെ തിരിഞ്ഞു നോക്കി ..

തന്റെ റൂം ലക്ഷ്യമാക്കി മുകളിലേക്കു ഓരോ പടികൾ ചവിട്ടി കയറുമ്പോഴും അവളുടെ മനസ്സിൽ വിനയ് ചോദിച്ച ഓരോ ചോദ്യങ്ങൾ   അലയടിക്കുകയായിരുന്നു …

ശരിയാണ് ,വിനയേട്ടൻ പറഞ്ഞതെല്ലാം അക്ഷരംപ്രതി ശരിയാണ് …ഞാൻ എന്നെ പറ്റി മാത്രമേ ചിന്തിച്ചിരുന്നുള്ളു .എന്റെ ജീവിതം ,എന്റെ സന്തോഷങ്ങൾ ,എന്റെ വിഷമങ്ങൾ,എന്റെ സുഖങ്ങൾ  …..അവയ്ക്ക് മാത്രമാണ് ഞാൻ ഇന്ന് വരെയും പ്രാധാന്യം നൽകിയത്  ..

എന്റെ സ്വാർത്ഥതകൾക്കിടയിൽ  ആ മനുഷ്യനെ പറ്റി അറിയാനോ മനസ്സിലാക്കാനോ ഞാൻ ഇന്നോളം ശ്രെമിച്ചിട്ടില്ല …അത് എന്റെ പരാജയം തന്നെയാണ് ..

ഇനിയും ഞാൻ ഒരുപാട് മാറേണ്ടതുണ്ട് …വിനയേട്ടനോട് ഇന്ന് എനിക്ക് അടങ്ങാത്ത പ്രണയം ഉണ്ട് …ആ പ്രണയത്തിനു ഒരു വില ഉണ്ടാകണമെങ്കിൽ ഇന്ന് നിങ്ങൾ എന്റെ മുന്നിൽ നിരത്തിയ ചോദ്യങ്ങൾക്ക് ഉത്തരം തരാൻ ഞാൻ പ്രാപ്തിയുള്ളവളായി തീരണം  …അവൾ ഒരു ഉറച്ച തീരുമാനത്തോടെ തന്റെ മുറിയിലേക്ക് കയറി …

ഈ വിവാഹത്തിന്റെ അന്ന് മുതൽ ഇന്ന് വരെയുള്ള ഓരോ നിമിഷങ്ങളും അവൾ ഒന്നൊന്നായി ഓർത്തെടുത്തു …ഇടക്കിടക്കു തല കുടയുകയും എന്തോ ടെൻഷനിൽ എന്ന പോലെ നഖം കടിക്കുകയും ചെയ്തു …അവൾ മുറിയിലൂടെ അങ്ങോട്ടും ഇങ്ങോട്ടും നടന്നു …ഇടക്കിടക്കു എന്തോ  കണ്ടെത്തിയത് പോലെ ആലോചിച്ചു കൊണ്ടു അവിടെ തന്നെ നിന്നു ….

വിനയേട്ടാ ,നിങ്ങൾ ഇപ്പോൾ ഇത്രയും പറഞ്ഞത് കൊണ്ടു മാത്രമല്ല.കുറച്ചു നാളുകൾകൊണ്ടേ എനിക്ക് എന്തൊക്കെയോ സംശയങ്ങൾ തോന്നുന്നുണ്ടു …എന്റെ കുടുംബത്തെ നേരത്തെ തന്നെ അറിയാം എന്ന രീതിയിൽ നിങ്ങളുടെ വായിൽ നിന്നും വന്നു പോയ ചില വാക്കുകൾ ,ഇത്രയൊക്കെ വെറുത്തിട്ടും എന്നെ സംരക്ഷിക്കാൻ നിങ്ങൾ കാണിക്കുന്ന  ഈ താല്പര്യം ,…ഇതെല്ലാം കൂടി ചേർത്ത് വായിക്കുമ്പോൾ എന്തൊക്കെയോ സത്യങ്ങൾ ഞാനറിയാതെ മറഞ്ഞിരിക്കുന്നത് പോലെ .