ഹൃദയരാഗം 16 [Achu Siva] 867

അവൾ തീരത്തേക്ക് നടന്നു  കയറി ,അവിടെ തന്റെ കാൽപാദങ്ങൾ ഒന്നിന് പിറകെ ഒന്നായി മണ്ണിൽ പതിപ്പിച്ചു അടിവെച്ചടിവെച്ചു  അവൾ നടന്നു …കുറെ ദൂരം പിന്നിട്ടപ്പോൾ അവൾ അവിടെ ഇരുന്നു ….മറ്റെന്തിനേക്കാളും താൻ ഇന്ന് ഏറെ ഇഷ്ടപ്പെടുന്ന പേര് ,ഇടനെഞ്ചിൽ കോറിയിട്ട പേര് അത് അവൾ തന്റെ ചൂണ്ടു വിരൽ ഉപയോഗിച്ച് മണലിൽ എഴുതി ….വാസുകി വിനയ് ….ആ അക്ഷരങ്ങളുടെ ഭംഗി അവൾ ഒരു ചിരിയോടെ ,നാണത്തോടെ കുറച്ചു സമയം അവിടെ ഇരുന്നു നോക്കി കണ്ടു .പിന്നെ എഴുനേറ്റ് നടന്നു നീങ്ങി  ….പിറകെ  വന്ന വിനയ് അവൾ ഇരുന്ന സ്ഥലത്തേക്ക് നോക്കി ….തിര പാതി മായ്ച്ചു കളഞ്ഞ ചില അക്ഷരങ്ങൾ ….അയാൾ അതിലേക്ക് നോക്കി നിന്നു ….

മുന്നോട്ട് പോയ വാസു പെട്ടന്ന് തിരിഞ്ഞു നിന്നു അയാളെ നോക്കി …എന്നിട്ട് അയാളുടെ  അരികിലേക്ക് ഓടി വന്നു . ..

അതേയ് ,എനിക്കൊരു ഐസ്ക്രീം വാങ്ങി  തരുമോ ?ഒരു കൊഞ്ചലോടെ അവൾ ചോദിച്ചു .

വിനയ് അത് കേൾക്കാത്തത് പോലെ കൈയും കെട്ടി തിരിഞ്ഞു കടലിലേക്ക് നോക്കി നിന്നു …

പിന്നെ അവൾ ഒന്നും നോക്കിയില്ല …അയാളുടെ പാന്റിന്റെ പോക്കറ്റിൽ നിന്നും  വാലറ്റ് എടുത്തു അവൾക്കു വേണ്ടത്ര പൈസ എടുത്തിട്ട് അത്  വിനയ്ടെ കൈയിൽ തിരികെ ഏൽപ്പിച്ചു ….വിനയ് പകച്ചു പണ്ടാരമടങ്ങി അവളെ നോക്കി ….അവൾ അവിടെ നിന്നും ഓടി പോയി ….വിനയ് അവിടെ ഉള്ള ഒരു ബെഞ്ചിലായി വന്നിരുന്നു .

അവൾ ഐസ്ക്രീമും വാങ്ങി തിരികെ അയാൾക്ക് അരികിലേക്ക് വന്നു …ഒരെണ്ണം വിനയ്ക്കു നേരെ നീട്ടി …

എനിക്കിപ്പോ വേണ്ട വാസുകി …

അവൾക്കു ദേഷ്യവും സങ്കടവും ഒക്കെ കൂടി ഒരുമിച്ചു കയറി വന്നു …അവൾ അവനെ ചുണ്ട്  കൂർപ്പിച്ചു നോക്കി കൊണ്ടു കുറച്ചു അപ്പുറത്തായുള്ള ഒരു ബെഞ്ചിൽ പോയി ഇരുന്നു

സങ്കടം തീർക്കാനായി അവൾ രണ്ടു കൈയിലെയും ഐസ്ക്രീം ഓരോന്നായി മാറി മാറി കഴിച്ചു ….കുഞ്ഞു പിള്ളേർ കഴിക്കണ രീതിയിൽ ….അവൻ അത് വാങ്ങിക്കാത്തതിന്റെ ദേഷ്യം എല്ലാം കൂടെ ഐസ്ക്രീമിനോട് മല്ലിട്ടു തീർത്തു ….വിനയ്നോടുള്ള കെറുവ് കാരണം അയാളെ നോക്കാതെ സൈഡ് തിരിഞ്ഞു ഇരിക്കുകയാണ് ….ഐസ്ക്രീം മുഴുവൻ അവളുടെ മുഖത്തും മൂക്കിലും എല്ലാം പറ്റിപിടിച്ചിട്ടുണ്ട് .  .

അയാൾക്ക് എന്തെന്നില്ലാത്ത കൗതുകം തോന്നി …അവളുടെ പരിഭവങ്ങൾക്കു പോലും അത്രമേൽ സൗന്ദര്യം .ഓടി ചെന്നു അവളെ മാറോടണക്കാൻ അയാളുടെ മനസ്സ് തുടി കൊട്ടി ….എങ്കിലും ഇത്ര വേഗം അവൾക്കു മുന്നിൽ തോറ്റു അടിയറവു പറയാൻ അയാളിലെ ഈഗോ അവനെ തെല്ലും അനുവദിച്ചില്ല …വിനയ് ആ കാഴ്ച്ച മതി മറന്നു നോക്കി ഇരുന്നു …പിന്നെ തന്റെ മൊബൈൽ എടുത്ത് വാസുകിയുടെ ഈ കുറുമ്പുകളെല്ലാം അവളറിയാതെ ക്യാമറയിലൂടെ ഒപ്പിയെടുത്തു …പെട്ടന്ന് അവൾ അയാളെ തിരിഞ്ഞു നോക്കി …അയാൾ ഞെട്ടി മൊബൈൽ മാറ്റി ചെവിയിലേക്ക് വെച്ച് സംസാരിക്കുന്നത്   പോലെ ആക്ട് ചെയ്തു …

അവൾ അത് മുഴുവൻ കഴിച്ചിട്ട് മുഖം ഒക്കെ തുടച്ചു അവനരികിലേക്ക് വന്നു .. അയാളിരുന്ന ബെഞ്ചിന്റെ കുറച്ചു അപ്പുറത്തായി വന്നിരുന്നു ….പരസ്പരം അവർ ഒന്നു നോക്കി ..എങ്കിലും ഒന്നും സംസാരിച്ചില്ല …ഒന്നു ക്ഷമിച്ചൂടെ എന്ന് ആ കണ്ണുകൾ അയാൾക്ക്‌ മുന്നിൽ യാചിക്കുകയായിരുന്നു ..  .മുന്നിലായി പരന്നു കിടക്കുന്ന കടലിനേക്കാളേറെ ആഴത്തിൽ അവളോടുള്ള പ്രണയം മനസ്സിൽ തിങ്ങി നിറയുന്നത് തിരിച്ചറിയുന്നുണ്ടെങ്കിലും അതിനെയെല്ലാം വിദഗ്ദ്ധമായി മറച്ചു പിടിക്കാൻ ആണ് വീണ്ടും വീണ്ടും അയാളുടെ ബുദ്ധി അവനെ ഉപദേശിച്ചത് ….

കൈ കോർത്തു പിടിച്ചു നടന്നു നീങ്ങുന്ന അനേകം പ്രണയ ജോഡികളിലേക്ക് വാസുകിയുടെ കണ്ണുകൾ സഞ്ചരിച്ചു ….അവയെല്ലാം താനും തന്റെ വിനയേട്ടനും ആയിരുന്നെങ്കിൽ ….