വസന്തം പോയതറിയാതെ -12 [ദാസൻ] 469

ഒരെണ്ണം നല്ല കളർ സാരി അതായിരിക്കും ഗൗരിക്കുള്ളത് മറ്റേത് അമ്മയ്ക്കും എന്ന് ഞാൻ അനുമാനിച്ചു. രണ്ടു സാരിയും മോളുടെ ഡ്രസ്സും ആയി മോള് പുറത്തേക്കു പോയി, കുറെ കഴിഞ്ഞ് മോള് തിരിച്ചെത്തി. എല്ലാവരോടും രണ്ടുദിവസം മുമ്പ് ഫാമിലേക്ക് എത്താൻ പറഞ്ഞു.അപ്പോൾ മോൾക്കും എന്റെ കൂടെ വരണമെന്ന് നിർബന്ധിച്ചു. ഫാമിൽ നിന്നും പോയിട്ട് ഇപ്പോൾ 6 മാസം കഴിഞ്ഞു. അതുകൊണ്ട്, ഞാനും മോളും പാലക്കാടേക്ക് തിരിച്ചു. പോകുന്ന വഴി അണ്ണന്മാർക്കുള്ള ഓണത്തിനുള്ള ഡ്രസ്സും എടുത്തു കൊണ്ടാണ് പോയത്. അവിടെയെത്തി അണ്ണന്മാരോട് ഓണാഘോഷത്തിന്റെ കാര്യം പറഞ്ഞു. അവർക്കും അത് കേട്ടപ്പോൾ സന്തോഷം. ഓണത്തിന്റെ ഭാഗമായി എല്ലാ ജോലിക്കാർക്കും 5000 രൂപ കൂടുതൽ കൊടുക്കാൻ മോള് പറഞ്ഞു. ഓണത്തിന് അധികം ദിവസമില്ലാത്തതിനാൽ സദ്യക്കും മറ്റുമുള്ള ഒരുക്കങ്ങൾ തുടങ്ങാനും പറഞ്ഞു. പിന്നീട് തിരക്കുള്ള ദിവസങ്ങൾ ആയിരുന്നു. എന്നാലും മോള് ഉള്ളത് കൊണ്ട് ദൂരേക്കൊന്നും പോയില്ല എല്ലാം അണ്ണന്മാരെ ഏൽപ്പിച്ചു. ദിവസവും രാത്രി മോള് എന്റെ അടുത്ത് സംസാരിക്കാൻ വരും ആ കൂട്ടത്തിൽ ഗൗരിയുടെ കാര്യവും എവിടെയെങ്കിലും കൊള്ളിക്കും. അമ്മയെ പറ്റിയാണ് കൂടുതൽ സംസാരിക്കാറ്. എന്തായാലും തിരക്കുള്ളതിനാൽ ദിവസങ്ങൾ പോകുന്നത് അറിയുന്നില്ലായിരുന്നു.

ഇനി ഓണത്തിന് രണ്ടുദിവസം മാത്രം, രാവിലെ ചേട്ടനും കുടുംബവും പുറപ്പെട്ടിട്ടുണ്ട് എന്ന് വിളിച്ചായിരുന്നു. ഉച്ചയോടെ അവർ എത്തും, താമസിക്കാനുള്ള സൗകര്യങ്ങളൊക്കെ വൃത്തിയാക്കിയിട്ടുണ്ട്. കുറെ നാളുകളായി അടഞ്ഞു കിടക്കുകയായിരുന്നല്ലോ അതൊക്കെ, ജോലിക്കാരെ കൊണ്ട് കഴുകിയും തുടച്ചും കിടക്കകളൊക്കെ വെയിലത്തിട്ട് ഉണക്കിയും വെച്ചു. അവർ 12 മണിയോടെ എത്തി പിന്നീട് ആളും അനക്കവും ഒക്കെയായി. മോളും അമ്മയും അച്ഛനും എന്റെ കോട്ടേജിൽ കൂടി. വൈകീട്ട് എല്ലാവരും കൂടി ഇരിക്കുമ്പോൾ താര വിളിച്ചു, ഞാൻ ഫോണുമായി എഴുന്നേറ്റു. ഓണം ആശംസിക്കാൻ വിളിച്ചതാണ്. ഞാൻ തിരിച്ചും ആശംസകൾ പറഞ്ഞു. ഒരു ദിവസം കൂടി കടന്നു പോയത് അറിഞ്ഞില്ല നാളെ ഉത്രാടമാണ്. നാളത്തേക്ക് വേണ്ട കാര്യങ്ങളൊക്കെ അണ്ണന്മാർ സംഘടിപ്പിച്ചു കൊണ്ടുവന്നു. മുറ്റത്ത് നല്ല തണൽ ഉള്ളതുകൊണ്ട് പന്തലിന്റെ ആവശ്യം വന്നില്ല.