വസന്തം പോയതറിയാതെ -12 [ദാസൻ] 469

ഏട്ടനെ മാറ്റി നിർത്തി എന്തോ സംസാരിച്ചതിനു ശേഷം അകത്തു പോയി ഡ്രസ്സ് മാറി വണ്ടിയും എടുത്ത് പുറത്തേക്ക് പോയി. അദ്ദേഹം പോയതിനുശേഷം നിർബന്ധിച്ചപ്പോൾ ഏട്ടൻ കാര്യം പറഞ്ഞു. ആ താരയുടെ മകന് എന്തോ ആക്സിഡന്റ് പറ്റി സീരിയസാണ്. അവളുടെ പ്രണയ വിവാഹമായതിനാൽ രണ്ടു വീട്ടുകാരും സഹകരിക്കുന്നില്ല. വേറെ ആരും സഹായത്തിന് ഇല്ലാത്തതിനാലാണ് അദ്ദേഹത്തോട് പറഞ്ഞത്. അദ്ദേഹം പോയത് മോൾക്കും എനിക്കും ഒട്ടും ഇഷ്ടപ്പെട്ടില്ല കാരണം, ഈ ഓണത്തിന് തിരക്കെല്ലാം കഴിഞ്ഞ് വൈകുന്നേരം ഇരിക്കുമ്പോൾ, ഞങ്ങൾ തമ്മിലുള്ള പ്രശ്നങ്ങൾ പറഞ്ഞു തീർക്കാം എന്ന് മോള് ഉറപ്പു തന്നതാണ്. ഈ വിവരം മറ്റുള്ളവരോട് മോള് പറഞ്ഞിട്ടുള്ളതുമാണ് അവർക്കൊക്കെ, അത് സമ്മതവുമായിരുന്നു. ആ ഒരു സാധ്യതയാണ് ഇതുമൂലം നഷ്ടപ്പെട്ടത്. അതിന്റെ ദേഷ്യം ഞങ്ങൾക്ക് രണ്ടു പേർക്കും ഉണ്ടായി എന്നുള്ളത് സത്യമാണ്. മോൾ അത് തുറന്നു പറയുകയും ചെയ്തു എന്നാൽ, മറ്റുള്ളവർ അതിനെ എതിർത്തു. അദ്ദേഹം ഏത് ആപത്തിലും ഓടിയെത്തുന്നവനാണ് എന്നാണ് മറ്റുള്ളവർ പറഞ്ഞത്. എനിക്ക് ആദ്യം വിഷമം തോന്നിയെങ്കിലും പിന്നീട് ആലോചിച്ചപ്പോൾ ഒരു കുഞ്ഞിന്റെ കാര്യമല്ലേ അതും, ക്രിട്ടിക്കൽ സ്റ്റേജിൽ. ഞാനും മോളോട് അങ്ങനെയൊന്നും പറയരുത് എന്ന് പറഞ്ഞു. അദ്ദേഹം ഒരു തവണയല്ല പലതവണ എന്നെ സഹായിച്ചിട്ടുണ്ട്, നേരിട്ടല്ലെങ്കിലും. എന്തിന്, ഉള്ള ദ്രോഹം മുഴുവൻ ചെയ്തു പിരിഞ്ഞതിനുശേഷം അന്ന്, ആക്സിഡന്റ് പറ്റി റോഡരികിലെ പാടത്ത് വണ്ടിയിൽ കിടക്കുമ്പോൾ നേരിയ ഓർമ്മയിൽ ഞാൻ, അതുവഴി പോയ പല വണ്ടിക്കാരെയും കൈ ഉയർത്തി സഹായം അഭ്യർത്ഥിച്ചെങ്കിലും നോക്കിപ്പോയതല്ലാതെ ആരും അടുത്തേക്ക് പോലും വന്നില്ല. പിന്നീട് ഓർമ്മ പോയി കിടക്കുമ്പോൾ അതുവഴി വന്ന വിനുവേട്ടനാണ് എന്നെ ഹോസ്പിറ്റലിൽ ആക്കിയത്. കൂടാതെ വീട്ടിൽ അറിയിച്ച് പുറത്ത് അമ്മയും മറ്റും വരുന്നതുവരെ കാത്തു നിന്നു.