ദൗത്യം 16 {ഫൈനൽപാർട്ട്‌}[ശിവശങ്കരൻ] 201

 

“കാശീ… മാമാ…” ഇതെല്ലാം കണ്ടുകൊണ്ട് നിന്നിരുന്ന അരുൺ തിരിഞ്ഞു കാശിയെ നോക്കി. സച്ചിയുടെ കത്തിമുനയിൽ നിന്നു എല്ലാം കണ്ടു വിറക്കുകയായിരുന്നു കാശി.

 

“അയ്യാ, എന്നെ ഒന്നും പണ്ണിടാതെ…” അയാൾ നിലവിളിച്ചു.

 

“ഇല്ലെടോ, തന്നെ ഒന്നും ചെയ്യുന്നില്ല പകരം താൻ കുറച്ചു കാര്യങ്ങൾ ഞങ്ങൾക്ക് വേണ്ടി ചെയ്തു തരണം. വെറുതെ വേണ്ടാ, അതിനു അതിനു തക്ക പ്രതിഫലവും തരാം.”

 

കാശി പേടിയോടെ തലയാട്ടി…

 

അരുണും വരുണും ചേർന്നു തളർന്നു കിടന്ന വാസുദേവനെ എടുത്ത് പുറത്തു കിടന്ന ഒരു കറുത്ത അംബാസിഡർ കാറിൽ ഇരുത്തി. വരുൺ ഡ്രൈവിംഗ്  സീറ്റിലേക്ക് കയറി.

എല്ലാം കണ്ടു പേടിയോടെ ഒരു മൂലയിൽ ഒതുങ്ങിയിരുന്ന വിദ്യയുടെ കയ്യിലെ കത്തിയുടെ മുന അരിച്ചിറങ്ങുന്ന വെള്ളിവെളിച്ചത്തിൽ തിളങ്ങുന്നുണ്ടായിരുന്നു…

 

വാസുദേവനെ കയറ്റിയ കാർ മുന്നോട്ട് പോയതും, കമ്മിഷണർ അജയ് രവീന്ദ്രനും സംഘവും അങ്ങോട്ടേക്ക് എത്തി. പോലീസുകാർ സ്ഥലം പരിശോധിച്ചുകൊണ്ടിരുന്നപ്പോൾ വേദലക്ഷ്മി കമ്മിഷ്ണറോട് ഉണ്ടായ കാര്യങ്ങൾ എല്ലാം പറഞ്ഞു.

 

“അപ്പോൾ നിങ്ങളെ തട്ടിക്കൊണ്ടു വന്ന ഗുണ്ടകളും മുതലാളിമാരും തമ്മിലുള്ള അടിപിടിയാണ് ഇവിടെ നടന്നത്, അല്ലേ?”

 

“അതേ സർ”

 

“അപ്പൊ അയാളോ?” മറ്റൊരു പോലീസുകാരനുമായി സംസാരിച്ചു നിൽക്കുന്ന അരുണിനെ ചൂണ്ടി കമ്മിഷണർ ചോദിച്ചു.

 

തന്റെ നേരെ അവർ നോക്കുന്നതും വേദയുടെ കണ്ണിലെ ദയനീയതയും കണ്ട അരുൺ അങ്ങോട്ട് ചെന്നു.

 

“എന്താണ് സർ എന്റെ ഭാവി ഏട്ടതിയമ്മ നിന്നു പരുങ്ങുന്നത്…?”

 

“എന്തോ, ഭാവി ഏട്ടത്തിയമ്മയോ, അപ്പൊ നീ എല്ലാം തീരുമാനിച്ചോ മിസ്റ്റർ അരുൺ രാഘവ്?”

 

“വലിയേടത്ത് ഗ്രൂപ്പ്‌ ഓഫ് കമ്പനിസിന്റെ ഉടമ വലിയേടത്ത് വിജയരാഘവന്റെ മകന് ഒരൊറ്റ തീരുമാനം ഒള്ളൂ സർ”

 

“ഒന്ന് പോയെടാ മരമാക്രി, അവന്റെ ഒരു സർ…”

അതുപറഞ്ഞു കമ്മീഷണർ അജയ് അരുണിന്റെ തോളിൽ ഇടിച്ചു.

 

രണ്ടുപേരും ഇത്ര ക്ലോസ് ആയി സംസാരിക്കുന്നത് കണ്ടപ്പോൾ വേദയുടെ കിളി പോയിരുന്നു മാത്രമല്ല, അരുൺ തന്നെ ഏട്ടത്തിയമ്മ എന്ന് വിളിച്ചത് ഏതർത്ഥത്തിലാണ് എന്നുള്ളത് അവളെ കുഴക്കി.

 

“അരുൺ, എനിക്കൊന്നു സംസാരിക്കണം…” അജയ് പോയിക്കഴിഞ്ഞു വേദ അരുണിനോട് പറഞ്ഞു.

 

“ഏട്ടത്തിയമ്മേ വൺ മിനിറ്റ്, ഒരു കാര്യം കൂടി ചെയ്യാനുണ്ട്.” അവൻ നേരെ കാശിയുടെ അടുത്തേക്ക് ചെന്നു, എന്തൊക്കെയോ രഹസ്യമായി പറഞ്ഞു.

 

തിരിഞ്ഞു നടക്കുന്നതിനിടയിൽ, സംശയത്തോടെ നിന്ന കാശിയോട് അവൻ വിളിച്ചു പറഞ്ഞു “പൂർത്തിയാക്കി വന്നാൽ 25 ലക്ഷം… ഓർത്തോ…”

 

കാശി തമിഴ്നാട് രജിസ്‌ട്രേഷൻ ടാറ്റ ലോറിയുടെ താക്കോലുമായി പുറത്തേക്ക് നടന്നു.

 

******************************