ചെകുത്താന്‍ വനം 2. റോബിയും രണശൂരൻമാരും [Cyril] 2242

അവസാനം അങ്ങ് അറ്റത്ത് പത്ത് സ്റ്റാന്‍ഡുകളിൽ പിടിപ്പിച്ചിരുന്ന ടാര്‍ഗറ്റ് ബ്ലോക്കുകള്‍ ഞാൻ നിരീക്ഷിച്ചു. അപ്പോൾ ആളുകളുടെ സംസാരവും വാതില്‍ തുറക്കുന്ന ഒച്ചയും ഞാൻ കേട്ടു.

‘ആരും എന്റെ ശത്രുക്കൾ അല്ല…. ആരെയും ശത്രുക്കളായി കാണരുത്…. ആരോടും ദേഷ്യം പ്രകടിപ്പിക്കാന്‍ പാടില്ല….. സമാധാനപരമായ സംഭാഷണം – അതിലൂടെ മാത്രമേ കാര്യങ്ങൾ മനസ്സിലാക്കാനും തീരുമാനങ്ങൾ എടുക്കാനും കഴിയുകയുള്ളു.’ ഞാൻ എന്റെ അനുസരണ കെട്ട മനസ്സിനോട് പറഞ്ഞു.

എല്ലാവരും പഴയത് പോലെ വട്ടം കൂടി ഇരുന്നു വെങ്കിലും എല്ലാവരും മൗനമായി എന്നെ നോക്കി ഇരുന്നു. എന്റെ മനസ്സില്‍ ഒരു പിടച്ചില്‍ ഉണ്ടായി. നാല്‍പ്പത്തി ആറ് കണ്ണുകൾ എന്റെ മേല്‍ പതിച്ചത് കൊണ്ടായിരിക്കും.

“റോബിക്ക് എതിര്‍പ്പില്ലെങ്കിൽ റോബിയുടെ പെട്ടിയും അതിലുള്ള ആയുധങ്ങളേയും ഞങ്ങൾക്ക് കാണിച്ച് തരുമോ.” ഒരു രണശൂരൻ ചോദിച്ചു.

അതിന്‌ ഉത്തരം നല്‍കാതെ ഞാൻ അയാളെ വെറുതെ നോക്കി ഇരുന്നു. അയാൾ പെട്ടന്ന് അച്ഛനെ നോക്കി.

“ക്ഷമിക്കണം റോബി, നിനക്ക് ഇതുവരെ ഞാൻ ആരെയും പരിചയപ്പെടുത്തി തന്നില്ല.” അച്ഛൻ പറഞ്ഞു.

“ഇത്…….” അച്ഛൻ തുടങ്ങിയതും ഞാൻ കൈ കാണിച്ച് അച്ഛനെ തടഞ്ഞു.

“ആദ്യം എനിക്ക് നിങ്ങളുടെയും തിരുമേനിയുടെയും യഥാര്‍ത്ഥ പേരുകളാണ് അറിയേണ്ടത്.” ഞാൻ പറഞ്ഞു. ഉടൻ തന്നെ അച്ഛൻ തലയാട്ടി.

“എന്റെ പേര് രുദ്രനന്തൻ തന്നെയാണ്‌ റോബി. അഞ്ഞൂറ് വർഷങ്ങൾക്ക് മുമ്പാണ് ഞാൻ തിരുമേനിയുടെ വേഷം സ്വീകരിച്ചത്.” തിരുമേനി പറഞ്ഞു.

അച്ഛൻ പതിയെ കസേരയില്‍ നിന്നും എഴുന്നേറ്റു. എന്നിട്ട് അയാൾ തുടങ്ങി

“ഞാൻ മാന്ത്രികന്‍ കിരണചന്ത്രൻ. ഇപ്പോൾ ജീവിച്ചിരിക്കുന്ന എല്ലാ രണശൂരൻ മാരുടെയും ദേവന്‍. അതി ശക്തരായ മാന്ത്രികർ പരമ്പരയില്‍ ജനിച്ച ശക്തനായ മാന്ത്രികന്‍ വേതചന്രൻറ്റെ മൂത്ത പുത്രനാണ് ഞാൻ. തിന്മയെ അമര്‍ച്ച ചെയ്യാൻ ശക്തിയുള്ള ഐറീൻ വംശത്തിൽ ജനിച്ച് എന്റെ പിതാവിന്റെ ആദ്യ ഭാര്യയായി തീര്‍ന്ന ആവല്യാദേവി യുടെ മൂത്ത പുത്രനാണ് ഞാൻ. നന്മയുടെ വെളിച്ചത്തിൽ വളര്‍ന്ന് തിന്മയുടെ പിടിയിലായ എന്റെ പ്രിയ സഹോദരി രൗത്രിക റാണിയുടെ മൂത്ത സഹോദരനാണ് ഞാൻ.” അത്രയും പറഞ്ഞ ശേഷം അച്ഛ…. കിരണചന്ത്രൻ ചുവന്ന് കലങ്ങിയ കണ്ണുകളോടെ എന്റെ കണ്ണില്‍ നോക്കി പറഞ്ഞു, “നിന്റെ അമ്മയായ എന്റെ പ്രിയ സഹോദരി ആരണ്യ റാണിയുടെ മൂത്ത സഹോദരനാണ് ഞാൻ…..”