മരുതക്കാട്

Maruthakkadu | Author : Vampire

ഒന്ന്
||||||||

മരുതക്കാട്ടിലെ ചേറിനും, കാറ്റിനും, നീരിനും
എല്ലാം മരണത്തിന്റെ മണവും രുചിയും
താളവും ഉടലെടുക്കുന്ന നാളുകളിലാണ് ഞാനും
ശവങ്ങളും തമ്മിൽ ബന്ധം ഊട്ടിയുറപ്പിച്ച്
തുടങ്ങിയത്….

വെറുമൊരു കുടിയൻ ചേറുവായിരുന്ന എന്നെ ചാവ് ചേറു എന്ന പേരിലേക്ക് മരുതക്കാടും നാട്ടുകാരും എടുത്തുയർത്തിയതിനു പുറകിൽ വലിയൊരു കാരണം എന്റെ ആദ്യ ചാവെടുക്കലായിരുന്നു…!!!

മഴ നിർത്താതെ പെയ്ത മൂന്ന് ദിവസങ്ങൾക്ക്
ശേഷം, മരുതക്കാട് ഉണർന്നെഴുന്നേറ്റുവെന്ന്
തോന്നിയ ആ ദിവസം, അന്നായിരുന്നു
എന്റെ ആദ്യ ചാവെടുപ്പ്…..

മാക്രി മാരിയുടെ കെട്ടിയവളുടെ വീട്ടിൽ നട്ടുച്ചക്ക് ചാരായവും കുടിച്ചിരിക്കുമ്പോഴാണ്, പുറത്ത് നിന്ന് ഒച്ചയും ബഹളവും കേട്ടത്… കുടിച്ചിരുന്ന കുപ്പിയെ
മുഴുവനായി അകത്താക്കി ചാരായത്തിന് കടവും
പറഞ്ഞ് പുറത്തേക്കിറങ്ങുമ്പോൾ എതിരെ വന്നത് ചെത്തുകാരൻ ചാഴി ചാമിയാണ്……

ഉടുത്തിരുന്ന പഴകി പിഞ്ചിയ ഒറ്റമുണ്ട് തുടയുടെ
മുകളിലേക്ക് വലിച്ച് കേറ്റി,ചാഴി ചാമിയുടെ
കൂടെ ഓട്ടം തുടങ്ങി, അത് അവസാനിച്ചത്
തേങ്ങാക്കാരൻ തൊമ്മന്റെ പറമ്പിലെ
കുളത്തിലാണ്…..

കുളത്തിന്റെ കരയെല്ലാം മരുതക്കാട്ടിലെ
ജനങ്ങളാൽ നിറഞ്ഞിരുന്നു… മൂക്ക് പൊത്തിയും
ഓക്കാനിച്ചും കുളത്തിന് ചുറ്റും നിന്നവരിൽ
എല്ലാവരുടേയും കണ്ണ് പാഞ്ഞത് തിണ്ട് ഇടിഞ്ഞ്
താഴോട്ടിറങ്ങിയ കൈത പടർന്ന് കയറിയ തെക്കേ
മൂലയ്ക്കലേക്കാണ്……

കൈതകൂടിന്റെ മൂലക്ക്, ഇടയിലൊരിടത്ത്
ചോരവറ്റി വരൾച്ച വന്ന ഒരു ഉപ്പൂറ്റിയിലുടക്കി
എന്റെ കാഴ്ച്ചയും അവസാനിച്ചു… ഉപ്പുറ്റിക്ക്
ശേഷമുള്ളതെല്ലാം കൈതയുടെ ഏറ്റവും
അടിയിലെവിടെയോ ഉടക്കി കിടക്കുന്നതിനാലാകണം ആ ശരീരം പൊങ്ങി വന്നതില്ല…

പോലീസും, നാടു മുഴുവനും വന്നിട്ടും ആ ഉടലെടുക്കാൻ ആരും ധൈര്യം കാണിച്ചില്ല…!

ഉള്ളിൽ കത്തിയമരുന്ന ചാരായത്തിന്റെ
രുചിയിൽ ഞാനും തൊമ്മനും പോലീസും ഒരു
ഉടമ്പടിയിലെത്തി ചേർന്നു….