✮കൽക്കി࿐ (ഭാഗം – 20 ) വിച്ചു [ചെകുത്താനെ സ്നേഹിച്ച മാലാഖ ] 893

<<<<<<<<<<<<<•>>>>>>>>>>>>>

ഏകദേശം അഞ്ച് നൂറ്റാണ്ടുകൾക്ക് മുൻപ് …..
ആ പഴയ കാലം , പഴയ വൈകുണ്ഡ പുരി .

ജാതിയും മതവും കൊടികുത്തി വാണ കാലം . കീഴാളനെന്നും മേഴാളനെന്നും മനുഷ്യനെ തരം തിരിച്ച് ഞരമ്പിലൂടെ ഒഴുകുന്ന രക്തം ഒന്ന് തന്നെയെന്ന് പോലും തിരിഞ്ഞ് നോക്കാതെ ഭരണാധികാരികൾ നാട് വാണ കാലം . ഇനിയുള്ള കഥ അവിടെയാണ് , തെരുവിലെ നായകന് കൊട്ടാരത്തിലെ രാജകുമാരിയോട് പ്രണയം തോന്നിയ ആ കഥ .

                    ……………………..

ആ പഴയ കാലത്തെ ചേകവർ മന ….

എങ്ങും ഇരുട്ട് പരന്ന സമയം , ചുറ്റിലും നിശബ്ദത മാത്രം …. ആ മനയുടെ ഉമ്മറത്തിരുന്ന് എരിയുന്ന എണ്ണ വിളക്കിലെ പ്രകാശം അവിടെ മുഴുവൻ ഒരു അരണ്ട വെളിച്ചം പോലെ പരന്ന് നിന്നിരുന്നു …. ആ വെളിച്ചത്തിൽ ആ മനയുടെ പടിക്ക് പുറത്തായി നിൽക്കുന്ന ഒരു മനുഷ്യ രൂപം അവ്യക്തമായി കാണാം , ഒരു കീറിയ മുണ്ടും തോളിലായി ഒരു മുഷിഞ്ഞ തോർത്തുമിട്ട് നിൽക്കുന്ന ഒരാൾ ….

അൽപ്പ സമയം കഴിഞ്ഞതും ആ മനയുടെ മുൻവാതിൽ തുറന്ന് ഒരാൾ പുറത്തേയ്ക്ക് വന്നു , കാഴ്ചയിൽ തറവാടിത്തവും വീരത്വവും തോന്നുന്ന മുഖഭാവം , ധരിച്ചിരിക്കുന്നത് പുതുപുത്തൻ വസ്ത്രം , കയ്യിലും കഴുത്തിലും സ്വർണ്ണ ആഭരണങ്ങൾ . അയാളുടെ കയ്യിൽ എന്തോ ഇരുപ്പുണ്ട് ഒരു പട്ട് തുണിയിൽ പൊതിഞ്ഞ എന്തോ ഒന്ന് ….

അയാൾ വരുന്നത് കണ്ടതും മനയ്ക്ക് പുറത്ത് നിന്നയാൾ കൈ കൂപ്പി അൽപ്പം നടു താഴ്ത്തി വണങ്ങി നിന്നു ….