✮കൽക്കി࿐ (ഭാഗം – 14 ) വിച്ചു [ചെകുത്താനെ സ്നേഹിച്ച മാലാഖ ] 1269

” അച്ഛാ …. അവൾ ….. എന്താ എല്ലാരും ഇതൊക്കെ കണ്ടിട്ട് നോക്കി നിൽക്കുന്നേ ….. അവന്മാർ അവളെ ….. ”

ദക്ഷ ഭയത്തോടെ പറഞ്ഞു കൊണ്ട് നിസഹായതയോടെ തന്റെ അച്ഛനെ നോക്കി . രഘുറാമാകട്ടെ ദക്ഷയുടെ കയ്യിൽ മുറുകെ പിടിച്ചു , ശേഷം അയാൾ പതിയെ തലയാട്ടി നമ്മൾക്ക് ഒന്നും ചെയ്യാൻ കഴിയില്ല എന്ന ഭാവത്തിൽ .

ആ പെൺകുട്ടിയെ ആൾക്കൂട്ടത്തിനിടയിൽ നിന്ന് പിടിച്ച് വലിച്ചു കൊണ്ട് വന്നവൻ വീണ്ടും അടിയേറ്റ് നിലത്ത് കിടക്കുന്ന അവളുടെ കയ്യിൽ കയറി പിടിക്കാനായി തുനിഞ്ഞു , അവളെ ജീപ്പിൽ കയറ്റാൻ വേണ്ടി .

അവളുടെ കയ്യിൽ പിടിക്കാനായി അവൻ കുനിയാൻ ശ്രമിച്ചു പക്ഷെ അതിന് കഴിയുന്നില്ല , ആരോ പുറകിൽ നിന്ന് തന്റെ ഷർട്ടിന്റെ കോളറിൽ പിടിച്ചിരിക്കുന്നത് പോലെ .

ദേഷ്യഭാവത്തോടെ അവൻ തിരിഞ്ഞ് നോക്കി , അപ്പോൾ അവൻ കാണുന്നത് കർച്ചീഫ് കൊണ്ട് മുഖം മറച്ച ഒരാൾ തന്റെ ഷർട്ടിൽ ഇടത് കൈ കൊണ്ട് മുറുക്കെ പിടിച്ചിരിക്കുന്നു ….

” എന്താടാ ….. ആരാടാ നീ ….. ? ”

ദേഷ്യത്തോടെയുള്ള അവന്റെ ശബ്ദം അവിടെ മുഴുവൻ മുഴങ്ങി തൊട്ട് പിന്നാലെ കാതടപ്പിക്കുന്ന മറ്റൊരു ശബ്ദവും …. ആ കാഴ്ച കണ്ട് ചുറ്റിലും നിന്നവർ ഒരു നിമിഷം സ്തംഭിച്ച് നിന്നു പോയി , ശ്വസിക്കാൻ പോലും മറന്നത് പോലെ .

തന്നെ നോക്കി അവൻ ദേഷ്യത്തോടെ ആ ചോദ്യം ചോദിച്ചതിന് പിന്നാലെ ആദി തന്റെ വലത് കൈ
ഉയർത്തി വീശി അവന്റെ കരണത്തേയ്ക്ക് ആഞ്ഞടിച്ചു , അടി കൊണ്ടവൻ നേരത്തെ ആ പെൺകുട്ടി വീണത് പോലെ രണ്ടു മൂന്ന് തവണ വട്ടം കറങ്ങിയ ശേഷം നിലത്തേയ്ക്ക് മലർന്നടിച്ച് വീണു ..