✮കൽക്കി࿐ (ഭാഗം – 26) വിച്ചു [ചെകുത്താനെ സ്നേഹിച്ച മാലാഖ ] 625

” മുത്തശ്ശാ ഞാൻ ! ”

ദക്ഷ അനുവിനെയും തന്റെ മുത്തശ്ശനെയും ഒന്ന് നോക്കിയ ശേഷം സംശയത്തോടെ നിന്നു ….

” അമാന്തിക്കണ്ട ഒന്നുകിൽ ചേകവർ മനയിലെ ചേകവർ അയാളുടെ അഭാവത്തിൽ മനയിലെ കാരണവർ , ഇനി അയാളും ഇല്ലെങ്കിൽ ക്ഷേത്രം കർമ്മി … പക്ഷെ എന്തോ എന്റെ മനസ്സ് പറയുന്നത് ചേകവർ മനയിലെ ചേകവർക്കുള്ള ആദ്യ സ്ഥാനം പോലെ മോളും ആദ്യ സ്ഥാനക്കാരി ആണെന്ന് … സംശയം വേണ്ട …
മ് …… ”

അയാൾ പറഞ്ഞതും ദക്ഷ മുന്നിലേക്ക് നീങ്ങി , ഭാർഗ്ഗവരാമനും അനുവും കണ്ണുകളടച്ച് പ്രാർത്ഥനയോടെ നിൽക്കുകയാണ് … പെട്ടെന്ന് ദക്ഷ വലത്തേക്ക് തിരിഞ്ഞ് നോക്കി , അവിടെ മരത്തിന് പുറകിലായി തന്നെ നോക്കി നിൽക്കുന്ന ആദിയെ കണ്ടതും അവളുടെ മുഖത്ത് എന്തെന്നില്ലാത്ത സന്തോഷം നിറഞ്ഞു … ദക്ഷ തന്നെ നോക്കുന്നത് കണ്ടതും ആദി കണ്ണുകൾ ചിമ്മിയടച്ച് ദീപം തെളിയിക്കാൻ അവളോട് ആംഗ്യം കാട്ടി , അത് കണ്ടതും ഒരു പുഞ്ചരിയോടെ അവൾ ആ കൽവിളക്കിലേക്ക് ദീപം പകർന്നു ….

അൽപ്പം കഴിഞ്ഞതും ….

” വാ മക്കളെ നമുക്ക് മടങ്ങാം …. ഇനിയുള്ള ചടങ്ങുകളും മറ്റും അവർ നോക്കിക്കോളും …. ”

ഭാർഗവരാമൻ അതും പറഞ്ഞ് അവിടെ നിന്ന് പുറത്തേയ്ക്ക് നടന്നു പുറകെ അവരും … മുന്നിലേയ്ക്ക് നടക്കുന്നതിനിടയിലും ദക്ഷ പല തവണ തിരിഞ്ഞ് നോക്കി പക്ഷെ ആദിയെ ആ മരച്ചുവട്ടിൽ കണ്ടില്ല ….

” എന്താ ചേച്ചീ … ”

അവളുടെ മുഖത്തെ ഭാവമാറ്റവും ഇടയ്ക്കിടെയുള്ള തിരിഞ്ഞ് നോക്കലും കണ്ട് അനു കാര്യം തിരക്കി ….